ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතාගේ උපදෙස් පරිදි මෙම වැඩපිළිවෙළ ක්‍රියාත්මක කළ අතර එමගින් උත්සව සමයේ වෙළෙඳපොලේ මත්ස්‍ය මිල ගණන් ඉහළ යාම පාලනය කිරීම අරමුණ විය. සාමාන්‍යයෙන් උත්සව සමයේ ඉස්සන් කිලෝවක් රු. 1300-1800 දක්වාත්, තලපත් කිලෝව රු. 1200- 1450 දක්වාත් ඉහළයයි. එමනිසා මත්ස්‍ය මිල ගණන් ඉහල යාම පාලනය කිරීම සඳහා ලංකා ධීවර සංස්ථාව මෙම පියවර ගනු ලැබීය.

ඒ අනුව නව සහන මිල යටතේ ලින්නා මාළු කිලෝග්‍රෑම් 01ක් රු. 250, බලයා කූරියා වශයෙන් කිලෝ ග්‍රෑම් 01ක් රු. 350ක් හා කපන ලද බල කිලෝ ග්‍රෑම් 01ක් රු. 550, තලපත් කිලෝ ග්‍රෑම් 01ක් රු. 720, හා ඉස්සන් කිලෝ ග්‍රෑම් 01ක් රු. 890කටත් අලෙවි කරනු ලැබීය. මෙම සහන මිල අප්‍රේල් මාසය පුරාම ක්‍රියාත්මකය. 2018.04. 05 දින සිට 18 දින දක්වා වු කාලය තුළ ලංකා ධීවර සංස්ථාව තම අලෙවි සැල්වලින් මසුන් කිලෝ ග්‍රෑම් 135,892.29ක් අලෙවි කර තිබේ. එමගින් උපයා ඇති ආදායම රු. 72,276,871.20කි. 2017 වසරේ දී උත්සව සමය තුළ මාළු කිලෝ ග්‍රෑම් 92,867.36ක් අලෙවි කරන ලද අතර එමගින් ලද ආදායම රු. 53,607,787.49කි.

ඒ අනුව මෙම වසරේ උත්සව සමයේ මත්ස්‍ය අලෙවිය සියයට 68 දක්වාත්, ඉන් ලද ආදායම සියයට 74 දක්වාත් ඉහළ නැංවීමට ලංකා ධීවර සංස්ථාවට හැකි වු බව අමාත්‍ය මහින්ද අමරවීර මහතා පවසයි. ඊයේ (23)
පස්වරුවේ අමාත්‍යාංශයේ දී පැවැති සාකච්ඡාවක දී මෙම තොරතුරු අනාවරණය විය.

ලංකා ධීවර සංස්ථාව පසුගිය කාලය පුරා අධික ලෙස පාඩු ලැබු රාජ්‍ය ආයතනයක් වශයෙන් එය වසා දැමීමේ තත්ත්වයක් පවා උද්ගත විය. නමුත් නව කළමනාකාරිත්වය යටතේ එම සංස්ථාව මේ වනවිට ආදායම් උපයමින්
යහපත් තත්ත්වයකට පත්ව තිබේ. 2018 සිංහල අලුත් අවුරුදු උත්සවය නිමිත්තෙන් රු.මි. 60ක පාරිතෝෂික දීමනා හා හිඟවැටුප් පවා ලබා දීමට එම සංස්ථාවට හැකිවිය.කෙසේ වුවද ලංකා ධීවර සංස්ථාව රාජ්‍ය ආයතනයක් වශයෙන් ලාභ ලබමින් ඉහළ මට්ටමකට ගෙන ඒම සම්බන්ධයෙන් ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතා එම සංස්ථාවේ සභාපති ජගත් පෙරේරා මහතා ඇතුළු සමස්ත කාර්ය මණ්ඩලයට තම කෘතඥතාව පළ කළේය.