හතළිහකට වැඩි පාසල් සංඛ්‍යාවක් නියෝජනය කරමින් 400 ඉක්මවූ තරගකරුවන් පිරිසකගේ සහභාගිත්වය ඇතිව දින 5ක් තිස්සේ පැවැති මෙම තරගාවලියෙන් 17-18 වයස් කාණ්ඩයේ කිලෝග්‍රෑම් 56-60 බර පන්තියේ තරගයට සහභාගි වූ මිහාන් ප්‍රනාන්දු රත්නපුර සීවලී මැදි විදුහලේ එච්.පී.පී. කල්පගේ වට 2-1ක් ලෙස පරාජය කොට බොක්සිං වළල්ලෙන් මහානාමය දිනාගත් පළමු රන් පදක්කමේ හිමිකරුවා බවට පත්විණි. ඒ හැරුණු විට ඔහු තරගාවලියේ දක්‍ෂතම ක්‍රීඩකයාට හිමි සම්මානයද දිනාගත් අතර ඔහු සමඟ තරග කළ කල්පගේ දක්‍ෂතම පරාජිතයා ලෙස තෝරාගනු ලැබීය.
මෙවර තරගාවලියේ තවත් විශේෂත්වයක් ලෙස සඳහන් කළ හැක්කේ උතුරු පළාත නියෝජනය කරමින් තරග වැදුණු ක්‍රීඩකයන් දෙදෙනකුද රන් පදක්කම් දිනාගැනීමට සමත් වීමය.
උතුරට රන් පදක්කම් රැගෙන යෑමේ ගෞරවය අවුරුදු 17-18 වයස් කාණ්ඩයේ කිලෝග්‍රෑම් 49-52 බර පන්තියේ අවසන් තරගය ජයගත් යාපනය හාට්ලි විදුහලේ එස්. ජීවන්ත්ට හා අවුරුදු 17-18 වයස් කාණ්ඩයේ කිලෝග්‍රෑම් 60-64 බර පන්තියේ අවසන් තරගය ජයගත් පුදුකුඩිඉරිප්පු මැදි විදුහලේ ජේ. ජෙන්සන්ට හිමිවිය.
ජීවන්ත් අතින් මෙන්ම ජෙන්සන් අතින්ද පරාජයට පත්ව තිබුණේ ගම්පහ බණ්ඩාරනායක විදුහලේ ක්‍රීඩකයන් වන ඒ.ඩී.ඒ. සඳරුවන් හා පී.එන්.ඩී. සුලක්‍ෂණ වීමද කැපීපෙනිණි.
SDF
