නොවැම්බර් 23, 2024
උතුරු මැද පළාතේ පවතින දැඩි නියඟය හේතුවෙන් පානීය ජලය නොමැතිව පීඩාවිඳින ජනතාවට පානීය ජලය ලබා දීම සඳහා ජනාධිපතිතුමාගේ උපදෙස් මත සිඳීගිය වැව් ආශ‍්‍රිතව ළිං කැපීමේ විශේෂ ව්‍යාපෘතියක් හෙට (07) අනුරාධපුර දිස්ත‍්‍රික්කයෙන් ආරම්භ කිරීමට නියමිතය.
නියඟය හේතුවෙන් වැව් හා ළිං සිඳීයෑමෙන් පානීය ජලය ලබා ගත නොහැකිව සිටින උතුරු මැද පළාතේ ජනතාව පිළිබඳ විශේෂ ව්‍යාපෘති අමාත්‍ය එස්.එම්. චන්ද්‍රසේන මහතා විසින් ජනාධිපති මහින්ද රාජපක්‍ෂ මැතිතුමා දැනුවත් කිරීමෙන් පසු වැවට කිසිදු හානියක් නොමැති වන ආකාරයට වැව් ආශ‍්‍රිතව පවතින "කට්ටකඩුවේ" එනම් බැම්මට පහළ කොටසේ (වැවේ පිටතේ) පානීය ළිං ඉදිකිරීමට ගොවි සංවිධාන නියෝජිතයන්ගේ එකඟතාව මත තීරණය කළ බව විශේෂ ව්‍යාපෘති අමාත්‍ය එස්.එම්. චන්ද්‍රසේන මහතා මේ පිළිබඳ අදහස් දක්වමින් සඳහන් කළේය.
ආර්ථික සංවර්ධන අමාත්‍යාංශය, විශේෂ ව්‍යාපෘති අමාත්‍යාංශය හා උතුරු මැද පළාත් සභාව ඒකාබද්ධව මේ ළිං ඉදිකිරීමේ කටයුතු සිදු කරනු ඇත.
නියඟයෙන් පීඩා විඳින ගම්මාන කරා මේ වන විට බවුසර් මඟින් ලබා දෙන ජලය ප‍්‍රමාණවත් නැති නිසා මෙම වැඩපිළිවෙළ ඇරඹෙන අතර බවුසර් මඟින් පානීය ජලය ලබා දීම දිගටම ක‍්‍රියාත්මක කරන බව ද අමාත්‍යවරයා පැවසීය.
හෙට පෙ.ව. 9.00ට තන්තිරිමලේදී මේ කාර්යය විශේෂ ව්‍යාපෘති අමාත්‍ය එස්.එම්. චන්ද්‍රසේන, උතුරු මැද පළාත් ප‍්‍රධාන අමාත්‍ය එස්.එම්. රංජිත් සමරකෝන් යන මහත්වරුන්ගේ ප‍්‍රධානත්වයෙන් ආරම්භ කෙරේ.
NDH
නවතම පුවත්
රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි. 1996 වර්ෂයේ මැද භාගයේ දී news.lk නමින් ආරම්භ කළ එය අන්තර්ජාලයට මුදාහරින ලද්දේ 1997 මාර්තු මස 01 දින දීය. එතැන් පටන් සිංහල, දෙමළ හා ඉංග්‍රීසි භාෂාවලින් පවත්වාගෙන යනු ලබයි.
+94 11 366 3040
