යුක්තිය පසිඳලීමේ කාර්යභාර්යය ජනතාවගේ අවශ්‍යතාවය මත වඩාත් පහසුවෙන් හා කාර්යක්ෂමව ලබාදීම සඳහා අධිකරණ අමාත්‍යංශය දිවයිනේ සියලුම මහේස්ත්‍රාත්, දිසා, මහාධිකරණ, පළාත්බද අධිකරණවල සේවා කටයුතු පුළුල් කිරීම සඳහා විශේෂ ව්‍යාපෘතියක් ආරම්භ කර තිබේ.
මේ යටතේ අධිකරණ ගොඩනැගිලි ප්‍රතිසංස්කරණය කිරීම,අලුතින් අධිකරණ සංකීර්ණ ඉදිකිරීම, දැනට ඉඩකඩ සීමිතව පවතින අධිකරණ ශාලාවල ඉඩකඩ පුළුල් කිරීම, අධිකරණ සේවා කටයුතු තොරතුරු තාක්ෂණය පදනම් කරගෙන ජාලගත කිරීම, දිවයිනේ අධිකරණ කටයුතු පවත්වාගෙන යෑම සඳහා අවශ්‍ය සේවක පිරිස් ලබාදීම පසුගිය කාලපරිච්ඡේදයේදී ඉටු කර ඇතැයි අධිකරණ අමාත්‍යාංශය පවසයි.
දිවයිනේ දැනට පවතින අධිකරණ සංකීර්ණවල අඩුපාඩු සොයා බැලීම සඳහා සෑම අධිකරණ බල ප්‍රදේශයකම අධිකරණ අමාත්‍ය ආචාර්ය විජයදාස රාජපක්ෂ මහතා විසින් සිදු කරන ලද නීරීක්ෂණ චාරිකාවලදී නීතිඥ සංගම් අධිකරණ කාර්ය මණ්ඩල හා මහජනතාව වෙතින් ලැබෙන ඉල්ලීම හා තොරතුරු පදනම් කරගෙන අධිකරණ සේවා කටයුතු පුළුල් කිරීම සඳහා මෙම පියවර ගත් බව අමාත්‍යංශය වැඩිදුරටත් සඳහන් කරයි.
