මුදල් අමාත්‍යාංශයේ ලේකම් ආචාර්ය ආර්.එච්.එස්. සමරතුංග මහතා ශ්‍රී ලංකා රජය වෙනුවෙන් මෙම ණය ගිවිසුමට අත්සන් කළ අතර ආසියානු සංවර්ධන බැංකුවේ මෙරට නේවාසික ධූත මණ්ඩල අධ්‍යක්ෂ වන ශ්‍රී විඩෝවතී මහත්මිය එම බැංකුව වෙනුවෙන් මෙම ණය ගිවිසුමට අත්සන් කොට ඇත.
ආසියානු සංවර්ධන බැංකුවේ සාමාන්‍ය ප්‍රාග්ධන සම්පත් අරමුදලෙන් මෙම ණය මුදල ලබා දීමට නියමිතය. කොටස් වෙළෙඳපොළ සංවර්ධන වැඩසටහනේ මූලික අරමුණ වන්නේ ශ්‍රී ලංකාවේ කොටස් වෙළෙඳපොළ රටේ අවශ්‍යතාවයන් සඳහා වඩා සාධනීය ලෙස ඒකරාශී කිරීමය. මෙමඟින් රටේ ආර්ථික සංවර්ධනය හා ආර්ථික වර්ධනය වඩා යහපත් ලෙස ඉහළ නැංවීමට බලාපොරොත්තු වේ. මෙම වැඩසටහන යටතේ කාර්යක්ෂමතාව දියුණු කිරීමට හා ස්ථාවර හා විනිවිදභාවයෙන් යුතුව කොටස් වෙළෙඳපොළ වර්ධනය කිරීමට ද බලාපොරොත්තු වේ. යෝජිත ඇමරිකානු ඩොලර් මිලියන 250ක ණය මුදලෙන් එක් කොටසක් ආසන්න වශයෙන් ඇමරිකානු ඩොලර් මිලියන 125 වන ලෙස වාර දෙකක දී ගෙවනු ලබන අතර අදාළ ප්‍රතිපත්ති ක්‍රියාකාරකම් සලකා ණය මුදල් නිකුත් කෙරෙනු ඇත.
මුදල් අමාත්‍යාංශය මෙම වැඩසටහන අධීක්ෂණය කරනු ලබන අතර එය ක්‍රියාත්මක කරන නියෝජිතයන් ලෙස ශ්‍රී ලංකා මහා බැංකුව, ශ්‍රී ලංකා සුරැකුම්පත් හා විනිමය කොමිෂන් සභාව, ශ්‍රී ලංකා රක්ෂණ මණ්ඩලය, ශ්‍රී ලංකා ගණකාධිකාරී සහ විගණන ප්‍රමිති උපදේශක සභාව කටයුතු කරනු ලබයි.
