න්‍යායපත්‍රයට ඇතුළත් කර තිබූ මෙම සංශෝධනය සහිත පනත් කෙටුම්පත ඉදිරිපත් කිරීමට මුලසුනේ සිටි නියෝජ්‍ය කතානායක චන්දිම වීරක්කොඩි මහතා දැනුම් දුන් අවස්ථාවේදී තමන් මෙම පනත් කෙටුම්පත ඉවත් කර ගන්නා බව වසන්ත සේනානායක මහතා සභාවට දන්වා සිටියේය.
මෙම සංශෝධනයෙන් දැනට ක්‍රියාත්මක වන ආණ්ඩුක්‍රම ව්‍යවස්ථාවේ 44 වන ව්‍යවස්ථාව 45 වන ව්‍යවස්ථාව සහ 26 වැනි ව්‍යවස්ථාව ඉවත් කර අලුතින් කොටස් එකතු කිරීමට යෝජනා කර ඇත. එම යෝජනාවලට අනුව ජනරජයේ අමාත්‍ය මණ්ඩලය අමාත්‍යවරුන් 30 දෙනෙකුට සීමා කිරීමටත් නියෝජ්‍ය අමාත්‍යවරුන් 31දෙනෙකුට සීමා කිරීමටත් ජනාධිපතිවරයාට රාජ්‍ය ආරක්ෂ අමාත්‍යාංශ ධූරය හැර වෙනත් අමාත්‍ය ධූර දැරීමට ඉඩ නොලැබෙන පරිදි ප්‍රතිපාදන සම්පාදනය කර ඇත.
ආණ්ඩු පක්ෂයේ පසුපෙළ මන්ත්‍රීවරයකු වූ සේනානායක මහතා සිය පෞද්ගලික පනත් කෙටුම්පත ඉදිරිපත් නොකරන බව දැනුම්දීමෙන් පසු නැගී සිටි විපක්ෂ ප්‍රධාන සංවිධායක ජෝන් අමරතුංග මහතා එම කෙටුම්පතේ අඩංගු කරුණු කියවීමට ගත් උත්සාහයට ඉඩ නොදුන් නියෝජ්‍ය කතානායකවරයා ඉදිරිපත් නොකළ පනත් කෙටුම්පත ගැන කතා කළ නොහැකි බව දන්වා සිටියේය.
පාර්ලිමේන්තු මන්ත්‍රී රවී කරුණානායක මහතා පනත් කෙටුම්පත ඉදිරිපත් කිරීමට උත්සාහ කළ ද ඊට ද මුලසුනෙන් අවස්ථාව නොලැබිණි.
NDH/HC
