වියළි කාළගුණික තත්ත්වය හේතුවෙන් පීඩාවට පත් දිස්ත්‍රික්ක 15 ක ප්‍රාදේශීය ලේකම් කොට්ඨාස 83 ක පීඩාවට පත් පවුල් 180,000 ක් වෙනුවෙන් මේ වන විට පානීය ජලය බෙදා හරිමින් පවතී.
එම කාර්ය වඩා සාර්ථක කර ගැනීම සඳහා ජනාධිපතිතුමාගේ උපදෙස් පරිදි ජනාධිපති කාර්යාලය විසින් මෙම ට්‍රැක්ටර් බවුසර් ලබාදීමට පියවර ගෙන තිබෙන අතර එහි පළමු අදියර යටතේ ට්‍රැක්ටර් බවුසර් 25 ක් දිස්ත්‍රික් ලේකම්වරුන් වෙත ලබාදීම ද සිදු විය.
කළුතර, කුරුණෑගල, මුලතිව්, කිලිනොච්චිය, වවුනියාව සහ මන්නාරම දිස්ත්‍රික්ක සඳහා මෙම ජල බවුසර් බෙදාදීම සිදු කෙරිණි.
අමාත්‍ය වජිර අබේවර්ධන, නියෝජ්‍ය අමාත්‍ය දුනේෂ් ගංකන්ද, ජනාධිපති ලේකම් පී.බී. අබේකෝන් යන මහත්වරුන් ඇතුළු පිරිසක් මෙම අවස්ථාවට එක්ව සිටියහ.
මේ අතර ආහාර නිෂ්පාදන ජාතික වැඩසටහන යටතේ නිෂ්පාදනය කරන වස විසෙන් තොර ආහාර ද්‍රව්‍ය අලෙවි කිරීමේ ජංගම රථය ද මෙහිදී ජනාධිපතිතුමාගේ නිරීක්ෂණයට ලක් විය.
