අධ්‍යාපන ප‍්‍රතිපත්ති සම්බන්ධයෙන් රජයට උපදෙස්දීම සඳහා පිහිටුවා ඇති ජාතික අධ්‍යාපන කොමිසන් සභාව සහ ජාතික අධ්‍යාපන ආයතනය එක්ව කරන ලද අධ්‍යයනයන් තුළ මෙම යෝජනා සකස් කර තිබෙන අතර ජාතික අරමුණුවලට අදාළ ව දැනට සාර්ථකව කි‍්‍රයාත්මකවන ප‍්‍රතිපත්තිමය ප‍්‍රතිසංස්කරණ තවදුරටත් ශක්තිමත් කිරීමෙන් එහි අඛණ්ඩතාව පවත්වාගෙන යාමත්, අලුතින් පැන නැගෙන අවශ්‍යතා සහ අභියෝගයන්ට මුහුණදීමට හැකිවන පරිදි වෙනස්කම් ඉස්මතු කර දක්වමින් මෙම යෝජනා සකස් කර තිබේ.
මෙහිදී අදහස් දැක්වූ ජනාධිපතිතුමා පෙන්වා දුන්නේ අපේ රටේ අධ්‍යාපන ප‍්‍රතිපත්ති දෙස අවධානය යොමු කිරීමේදී විෂය මාලාවලට අමතරව දරුවන්ට ස්වෝත්සාහයෙන් නැඟී සිටිය හැකි ප‍්‍රතිපත්තීන් තවමත් නිසි ලෙස කි‍්‍රයාත්මක වී නොමැති බවයි.
දරුවන්ගේ දක්ෂතා සහ හැකියාවන් හඳුනාගනිමින් නිර්මාණාත්මක ලෙස දක්ෂතාවයන් අනුව නැගි සිටීමේ අවස්ථා අධ්‍යාපන ප‍්‍රතිපත්තින් තුළ කි‍්‍රයාත්මකවීමේ අවශ්‍යතාවය ද ජනාධිපතිතුමා පැහැදිළි කළේය.
එමෙන්ම අධ්‍යාපන ක්ෂේත‍්‍රයේ මානව සම්පත් මෙන්ම භෞතික සම්පත් සමාන ලෙස බෙදී නොයාමේ ගැටලුව තවමත් විසඳී නොමැති බව පෙන්වා දුන් ජනාධිපතිතුමා මූලික පහසුකම් පවා සම්පූර්ණ නොවූ පාසල් බොහොමයක් තවමත් දිවයින පුරා පවතින බවත්, සියලු වගකිවයුත්තන්ගේ ප‍්‍රමුඛ අවධානය මේ පිළිබඳව යොමු විය යුතු බවත් කියා සිටියේය.
එමෙන්ම 05 වසර ශිෂ්‍යත්ව විභාගයේ තරගකාරිත්වය සහ ඒ පිළිබඳ දෙමාපියන් දරන ආකල්ප හේතුවෙන් දරුවන්ට මුහුණදීමට සිදුව තිබෙන අසීරුතාවයන් ද සිහිපත් කළ ජනාධිපතිතුමා ප‍්‍රකාශ කළේ නව අධ්‍යාපන ප‍්‍රතිත්ති සැකසීමේදී මේ පිළිබඳව ද පුළුල් අවධානයක් යොමු විය යුතු බවයි.
රටේ දරුවන්ට නිසි අධ්‍යාපනයක් නොලැබෙන්නේ නම් අන් කුමන කාර්යයකින්වත් ඵලක් නොවන බව ද අවධාරණය කළ ජනාධිපතිතුමා ජාතික අධ්‍යාපන කොමිෂන් සභාව, ජාතික අධ්‍යාපන ආයතනය සහ පළාත් අධ්‍යාපන ආයතන අවම වශයෙන් මාස 06 කට වරක්වත් රැස්වී සිදු විය යුතු නව වෙනස්කම් පිළිබද සාකච්ඡා කිරීමේ වැදගත්කම ද පැහැදිළි කළේය.
ජනාධිපති ලේකම් පී.බී. අබේකෝන්, ජාතික අධ්‍යාපන කොමිසන් සභාවේ සභාපති මහාචාර්ය ලක්ෂ්මන් ජයතිලක, අධ්‍යාපන ආයතනයේ අධ්‍යක්ෂිකා ආචාර්ය ජයන්ති ගුණසේකර යන මහත්ම මහත්මීන් සහ එම ආයතනවල ජ්‍යෙෂ්ඨ නිලධාරින් මෙම අවස්ථාවට එක්ව සිටියහ.
