ජනාධිපතිතුමා මේ බව ප‍්‍රකාශ කළේ දුෂ්කර ප්රදේශවල බෞද්ධ වෙහෙර විහාරස්ථාන සංවර්ධනයට පුණ්‍යාධාර පිරිනැමීම වෙනුවෙන් ඊයේ (02) පස්වරුවේ ජනාධිපති මන්දිරයේ පැවති උත්සවය අමතමිනි.
අඩු පහසුකම් සහිත වෙහෙර විහාරස්ථාන සංවර්ධනය සඳහා පිහිටුවන ලද බෞද්ධ පුනරුද අරමුදල යටතේ රුපියල් මිලියන 107 ක මුදලක් මෙලෙස විහාරස්ථාන අතර බෙදාදීම සිදු විය.
සම්බුද්ධ ශාසනයේ උන්නතිය වෙනුවෙන් ඉටුකළ යුතු සෑම යුතුකමක්ම ඉටු කිරීමට වත්මන් රජය බැඳී සිටින බව මෙහිදී පැවසූ ජනාධිපතිතුමා ශී‍්‍ර ලංකා මාතෘ භූමිය යහපත් රටක් ලෙස ගොඩනැගීමට එදත්, අදත්, හෙටත් අපගේ මහා සංඝරත්නය ලබාදෙන ගෞරවනීය නායකත්වය කෘතවේදීව සිහිපත් කළේය.
දශක තුනක් පුරා පැවති යුද්ධය හේතුවෙන් විනාශ වු උතුරු නැගෙනහිර ප්රදේශවල බෞද්ධ වෙහෙර විහාරස්ථානවල මූලික අඩුපාඩු සපුරාලීමට ති‍්‍රවිධ හමුදාවේ දායකත්වයෙන් විශේෂ වැඩපිළිවෙළක් කි‍්‍රයාත්මක කර ඇති බව ද පැවසූ ජනාධිපතිතුමා බෞද්ධ වෙහෙර විහාරස්ථාන ඇතුළු පුරාවිද්‍යාත්මක වටිනාකම්වලින් යුත් ස්ථානවල ආරක්ෂාව වෙනුවෙන් සිවිල් ආරක්ෂක බලකායේ දායකත්වයෙන් විශේෂ වැඩපිළිවෙළක් මෙම වසරේ සිට ආරම්භ කිරීමට උපදෙස් ලබාදී තිබෙන බව ද කියා සිටියේය.
පූජ්‍ය ඉත්තෑපානේ ධම්මාලංකාර මහා නායක ස්වාමින් වහන්සේ, පූජ්‍ය කොටුගොඩ ධම්මාවාස මහා නායක ස්වාමින්ද්‍රයාණන් වහන්සේ ප‍්‍රමුඛ මහා සංඝරත්නය ද කථානායක කරූ ජයසූරිය, අමාත්‍ය විජයදාස රාජපක්ෂ, නියෝජ්‍ය කථානායක තිලංග සුමතිපාල යන මහත්වරුන් ඇතුළු පිරිසක් ද මෙම අවස්ථාවට එක්ව සිටියහ.
