අමාත්‍යවරයා මේ බව ප්‍රකාශ කළේ පසුගිය දා කොටහේන දීපදුත්තාරාම විහාරස්ථානයේ පැවති අභාවප්‍රාප්ත තායිලන්ත රජතුමන්ට පිං පැමිණවීමේ උත්සවයට සහභාගි වෙමිනි.
එමෙන්ම එම යුගයේ දී ශ්‍රී ලංකාව සමග ඇති සබඳතාවය තවත් ලං වූ බවත් ලංකාව සමඟ තායිලන්තය මේ අයුරින් සම්බන්ධ කිරීම සම්බන්ධව භුමිබෝල් රජතුමාට ස්තුතිවන්ත විය යුතු බවත් පෙන්වාදුන් අමාත්‍යවරයා දෙවන ලෝක යුද්ධයෙන් පසුව නොදියුණු තායිලන්තය දියුණු ආර්ථිකයක් බවට පත්වූයේ භුමිබෝල් රජතුමන්ගේ සමයේ දි බවත් පෙන්වා දුන්නේය.
"කොටහේන දීප දුත්තාරාමය ලංකාවේ සහ තායිලන්තයේ බුදු දහම අතර ඇති සංකේතයක් බව කිව යුතුයි. තායිලන්ත අතීත රජවරුන් මෙම විහාරස්ථානයට පැමිණ ඒ සබඳතාවය තහවුරු කර තිබෙනවා. තායිලන්තයේ භුමිබෝල් රජතුමන්ගේ අභාවය වෙනුවෙන් මතක වස්ත්‍ර පූජා කිරීමට අද මෙම පිංකම සංවිධාන කර තිබෙනවා. මතක වස්ත්‍ර පූජාව අපටත් තායිලන්තයටත් පොදු වු සිරිතක් බව මෙහිදී සඳහන් කළ යුතුයි. ශ්‍රී ලංකාව මෙන් ම තායිලන්තයත් ථෙරවාදී බුදුදහම හෙවත් තෙරුන් වහන්සේලාගේ දහම ආරක්ෂා කිරීම නිසා එවැනි පොදු සිරිත් ආරක්ෂා වී පවතිනවා" යැයි ද පැවසීය.
"පළමුවෙන් ම ථෙරවාදී බුදු දහම ආරක්ෂා වුණේ සියමයේයි. ඊට පසුව රාමඤ්ඤ සහ අමරපුර නිකායන් ආරම්භ කිරීමට බුරුමයේ සහයෝගය ලැබුණා. ඒ අනුව අග්නිදිග ආසියාව සහ අප අතර සම්බන්ධය තහවුරු වී තිබෙනවා. එලෙස තහවුරු වූ සම්බන්ධය අවසන් පුරුක වුයේ තායිලන්තයේ අභාවප්‍රාප්ත භුමිබෝල් රජතුමායි. ශ්‍රී ලංකාව ජනරජයක් ලෙස පාලනය ගෙන යනවා. තායිලන්ත රාජධානියේ සංකේතයක් ලෙස රජ පරපුර තවමත් සිටිනවා".
තායිලන්තය මෙන් ම අපත් ථෙරවාදි බුදුදහම අනුගමනය කරන හෙයින් මරණය නියත බව හොදින්ම දන්නා බවත් භූමිබෝල් රජතුමා කළ සේවයට ස්තුති කොට එතුමන්ට නිවන් සැප ප්‍රාර්ථනා කරන බවත් පෙන්වාදුන් අග්‍රාමාත්‍යවරයා ශ්‍රී ලංකාවේ බෞද්ධයන් පමණක් නොව සියලු ම ලාංකිකයන් වන හින්දු, මුස්ලිම් ක්‍රිස්තියානි සියලු දෙනා වෙනුවෙන් අප එම ප්‍රාර්ථනා කරන බවත් වැඩිදුරටත් පෙන්වා දුන්නේය.
