මෙහිදී පත්වීම් ලිපි ප්‍රදානයෙන් පසු ව සිය අදහස් දැක්වූ ආරක්ෂක ලේකම්වරයා සිය ජීවිත පරිත්‍යාගයෙන් අප රටට සාමය උදාකර දුන් ත්‍රිවිධ හමුදාවන්ගේ සුභසාධන සඳහා අවශ්‍ය සියලු ම පහසුකම් ලබා දුන් බවත් ඔවුන් සඳහා අමාත්‍යාංශය, රණ විරු සේවා අධිකාරිය හා ආරක්ෂක හමුදා සුභසාධක ආයතන සහභාගීත්වයෙන් අභිමංසල, මිහිඳු සෙත් මැඳුර ආදී පහසුකම් ලබා දුන් බවත් පැවසූ අතර රණ විරුවන් හා ඔවුන්ගේ පවුල්වල ජීවන තත්ත්වය නඟාසිටුවීම සඳහා ඔවුන්ට නිවාස ඉදිකර දීම, දරුවන් සඳහා ආරක්ෂක සේවා විද්‍යාල පිහිටුවීම හා ශිෂ්‍යත්ව ලබාදීම ආදි වැඩසටහන් රාශියක් දියත් කර ඇති බවත් පසුගිය කාලය තුළ දී රණ විරු සේවා අධිකාරිය විසින් ද රණ විරුවන්ගේ සුභසාධනය සඳහා විශාල වැඩ කොටසක් ඉටු කරනු ලැබ ඇති බව ද පවසා සිටියේය.
එසේම ඉදිරියටත් රණ විරුවන් වෙනුවෙන් තවදුරටත් තවත් විශාල වැඩ කොටසක් කිරීමට ඇති බව පැවසූ ආරක්ෂක ලේකම්වරයා මෙම පත්වීම් ලබා ගැනීමෙන් අනතුරු ව තවදුරටත් කැපවීමෙන් යුතු ව ඉදිරියටත් ඔවුන්ගේ කාර්ය්‍යක්ෂම සේවය ලබා දෙන ලෙස ඉල්ලා සිටීමට ද මෙහිදී අමතක නොකළේය.
මෙම අවස්ථාව සඳහා රණ විරු සේවා අධිකාරියේ සභාපතිනිය වන පද්මා වෑත්තෑව, ආරක්ෂක හා නාගරික සංවර්ධන අමාත්‍යාංශයේ හමුදා සම්බන්ධීකරණ නිලධාරී මේජර් ජෙනරාල් (විශ්‍රාමික) පාලිත ප්‍රනාන්දු, රණ විරු සේවා අධිකාරියේ හා ආරක්ෂක අමාත්‍යාංශයේ ජ්‍යේෂ්ඨ නිලධාරීහු ද සහභාගී වූහ.
DB
