අද (19) දිවයිනේ බස්නාහිර, සබරගමුව සහ මධ්‍යම පළාත්වලත් ගාල්ල සහ මාතර දිස්ත්‍රික්කවලත් වැසි වාර කිහිපයක් ඇති වන අතර මෙම වැසි වයඹ පළාතට ද පැතිර යා හැක. සමහර ස්ථානවල මි.මී. 100ට වැඩි තද වැසි ද ඇති විය හැක.
අද උදෑසන 05.30ට නිකුත් කරන ලද කාලගුණ අනාවැකියට අනුව විශේෂයෙන් අපරභාගයේදී සහ රාත්‍රී කාලයේ දී සෙසු ප්‍රදේශවල තැනින් තැන ගිගුරුම් සහිත වැසි වර්ධනය වේ.
ගිගුරුම් සහිත වැසි ඇති වන විට එම ප්‍රදේශවල තාවකාලිකව තද සුළං ඇති විය හැක. අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.
ප්‍රධාන නගර සඳහා කාලගුණ අනාවැකිය
නුවරඑළිය, මහනුවර, රත්නපුරය, ගාල්ල සහ කොළඹට විටින් විට වැසි හෝ ගිගුරුම් සහිත වැසි ඇති වේ.
අනුරාධපුරය, යාපනය, මන්නාරම, ත්‍රිකුණාමලය සහ මඩකළපුවට විශේෂයෙන් අපරභාගයේදී හෝ රාත්‍රී කාලයේ දී ගිගුරුම් සහිත වැසි වර්ධනය වේ.
උෂ්ණත්වය හා වර්ෂාපතනය
උපරිම උෂ්ණත්වය සෙල්සියස් අංශක 34.0°C ත්‍රිකුණාමලයෙන් ද අවම උෂ්ණත්වය සෙල්සියස් අංශක 13.0°C නුවරඑළියෙන් ද අපේක්ෂා කෙරේ.
ඊයේ උදෑසන 8.30න් අවසන් වූ පසුගිය පැය 24 සඳහා උපරිම උෂ්ණත්වය සෙල්සියස් අංශක 33.5°C පොලොන්නරුවෙන් ද අවම උෂ්ණත්වය සෙල්සියස් අංශක 13.2°C නුවරඑළියෙන් ද උපරිම වර්ෂාපතනය මි.මී. 122.2 ගාල්ල තලන්ගහවත්ත ප්‍රදේශයෙන් ද වාර්තා වී තිබේ. අද අලුයම 2.30 වනවිට මි.මී. 81.3ක වර්ෂාපතනයක් රත්නපුරයෙන් වාර්තා වේ.
HC
