මෙම පුද්ගලයාව රිකිල්ලගස්කඩ මූලික රෝහලට තද උණ, වමනය, පාචනය හා මස්ගොබ වේදනාව වැනි රෝග ලක්ෂණ සහිතව ඇතුළත් කර ඇති අතර පසුව එම පුද්ගලයා මරණයට පත් වූ බව සෞඛ්‍ය සේවා අධ්‍යක්ෂ ජනරාල් වෛද්‍ය පාලිත මහීපාල මහතා පැවසීය.
මෙම හදිසි මරණය මී උණ රෝගය නිසා සිදු ව ඇතැයි විශ්වාස කරන අතර දැනට විදේශ රටවල් ගණනාවක ඉබෝලා රක්තපාත රෝගය ව්‍යාප්ත වෙමින් තිබෙන බැවින් ගෝලීය ආරක්ෂක පියවරක් ලෙස (Universal Precautions) මෙම මරණය පිළිබඳව පුළුල් අවධානයක් යොමු කිරීමට ප‍්‍රාදේශීය සෞඛ්‍ය බලධාරීන්ට උපදෙස් දී ඇති බව ද සෞඛ්‍ය සේවා අධ්‍යක්ෂ ජනරාල්වරයා වැඩිදුරටත් සඳහන් කළේය.
මේවන විට මරණයට පත් වූ එම පුද්ගලයාගෙන් ලබාගත් රුධිර සාම්පල බොරැල්ල වෛද්‍ය පර්යේෂණායතනයට යොමු කර ඇත. එහිදී එම සාම්පල ඉබෝලා වෛරස් පරීක්ෂණය සඳහා ද භාජනය කෙරෙනු ඇත. මරණයට පත්වූ එම පුද්ගලයා සමඟ සංචාරය සඳහා සහභාගී වූ සෙසු පුද්ගලයන් සම්බන්ධයෙන් ද විමසිලිමත් වන ලෙස මහජන සෞඛ්‍ය පරීක්ෂකයන්ට උපදෙස් දී ඇති බව ද සෞඛ්‍ය සේවා අධ්‍යක්ෂ ජනරාල්වරයා අවධාරණය කළේය.
මෙතෙක් ඉන්දියාවෙන් ඉබෝලා රෝගීන් වාර්තා වී නැති අතර එහෙත් ගෝලීය ආරක්ෂක ක‍්‍රමවේදයක් ලෙස මෙම පියවර ගෙන ඇත. එමෙන්ම ශ්රී ලංකාවට ඉබෝලා වෛරසය ඇතුළුවීම වළක්වාලීම සඳහා ගුවන්තොටුපළේ සිදු කෙරෙන පරීක්ෂණ කටයුතු පැය 24 පුරාම අඛණ්ඩව ක‍්‍රියාත්මක කර ඇති බව ද සෞඛ්‍ය අමාත්‍යාංශය අවධාරණය කළේය.
NDH/SK-cmu
