විභාග නීති කඩකරන්නන්ට 1968 අංක 25 දරන ප්‍රසිද්ධ විභාග පනත යටතේ දැඩි නීතිමය පියවර ගන්නා බව විභාග කොමසාරිස් ජනරාල් ඩබ්ලිව්.එම්.එන්.ජේ. පුෂ්පකුමාර මහතා අවධාරණය කරයි.
පස්වන ශ්‍රේණියේ ශිෂ්‍යත්ව විභාගය ලබන 17 වනදා ආරම්භ කෙරේ.
විභාගය පැවැත්වෙන සම්පූර්ණ කාලය තුළ උපකාරක පන්ති පැවැත්වීම මෙන්ම සංවිධාන කිරීම, පන්ති මෙහෙයවීම, විෂයානුබද්ධ දේශන, සම්මන්ත්‍රණ වැඩමුළු පැවැත්වීම, එම විභාග සඳහා අනුමාන ප්‍රශ්න ඇතුළත් ප්‍රශ්නපත්‍ර මුද්‍රණය කිරීම, ඒවා බෙදා හැරීම, විභාග ප්‍රශ්නපත්‍රවල ප්‍රශ්න ලබා දෙන බවට හෝ ඒ හා සමාන ප්‍රශ්න ලබා දෙන බවට පෝස්ටර් බැනර් කටවුට් අත් පත්‍රිකා විද්‍යුත් හෝ මුද්‍රිත මාධ්‍ය මඟින් ප්‍රසිද්ධ කිරීම හෝ එවැනි දෑ ළඟ තබා ගැනීම සපුරා තහනම් වේ.
මේ නියෝග නොසලකා හරින යම් පුද්ග‍ලයෙක් හෝ ආයතනයක් ක්‍රියා කරන්නේ නම් විභාග පනත කඩ කරන අයෙක් බව පෙන්වා දෙන විභාග කොමසාරිස් ජනරාල්වරයා මේ අයට එරෙහිව නීතිමය පියවර ගන්නා බව කියා සිටී.
මේ කරුණු කඩකරමින් විභාග නීතිරීති උල්ලංඝනය කරන අයකු හෝ ආයතනයක් වෙත් නම් ළඟම ඇති පොලිස් ස්ථානයට හෝ විභාග දෙපාර්තමේන්තුවට දැනුම් දෙන ලෙස ද විභාග කොමසාරිස් ජනරාල්වරයා ඉල්ලා සිටී.
විභාග නීති උල්ලංඝනය කරන්නන් පිළිබඳ විභාග දෙපාර්තමේන්තුවේ දූරකතන අංක 0112784208, 0112784537 හෝ විභාග දෙපාර්තමේන්තුවේ හදිසි ඇමතුම් අංක 1911ට හෝ පොලිස් මූලස්ථානය 0112421111 හෝ 1911 දූරකතන අංකවලට දැනුම් දිය හැක.
NDH
