අතුරුදන්වුවන් පිළිබඳ පැමිණිලි විමර්ශනය කිරීමේ ජනාධිපති කොමිසම් සභාවේ මීළඟ සැසි වාරය අගෝස්තු 8 සහ 9 යන දෙදින මන්නාරම් දිස්ත්‍රික්කයේ මාන්තෙයි බටහිර ප්‍රාදේශීය ලේකම් කාර්යාලයේ ද, අගෝස්තු 10 මන්නාරම් ප්‍රාදේශීය ලේකම් කාර්යාලයේ ද, අගෝස්තු 11 මඩු ප්‍රාදේශීය ලේකම් කාර්යාලයේ ද පැවැත්වේ.
මෙවර සැසි වාරය පුරා දින හතර තුළදී ග්‍රාම නිලධාරී වසම් 47ක් ආවරණය කෙරේ.
මේ දක්වා කොමිසමට ආරක්ෂක සාමාජිකයින්ගෙන් ලද පැමිණිලි 5,000ක් ඇතුළුව මුළු පැමිණිලි 19,284ක් ලැබී ඇත. කොමිසම විසින් පැමිණිලිකරුවන් 786 දෙනෙකුගේ පැමිණිලි විමර්ශනය කරමින් සිටින අතර එම සාක්ෂි තවදුරටත් ස්වාධීන පරීක්ෂණ කණ්ඩායමක් මගින් මෙහෙයවනු ලබයි.
කොමිසම විසින් මීට ඉහත දී මෙම වසරේ ජනවාරි, පෙබරවාරි, මාර්තු, ජූනි සහ ජූලි යන මසවලදී කිලිනොච්චි, යාපනය, මඩකළපුව, මුලතිව් සහ නැවතත් මඩකළපුව යන දිස්ත්‍රික්කයන් හිදී ජන හමු පවත්වා ඇත.
DB
