මෙම ප්‍රතිසංස්කරණය කටයුතු තුල දැනට ධාවනපථයේ පවතින ඉරිතැලීම, කඩතොලු තත්ත්වයන් අළුත්වැඩියා කොට ගුවන් යානා ගොඩබැස්සවීමේදි හා ගුවන්ගත කිරීමේදි භාවිතා වන ධාවන පථයේ ඝර්ෂණ මට්ටම වැඩි දියුණු කිරිම සදහා ආස්තරණය කිරිමක් සිදු කරනු ලබයි.
ඒ අනුව මෙම සංවර්ධන කටයුතු සිදු කිරිමේදි කාලගුණික තත්ත්වයන් හා සිවිල් ඉංජිනේරු අවශ්‍යතා පිළිබද විශේෂ අවධානයක් යොමු කරමින්ද, ගුවන්තොටුපල භාවිතා කරන ගුවන් සමාගම් සමග සාකච්ඡා කොට ගුවන්තොටුපල වසා දමන කාල පරිච්ඡේදය තීරණය කර ඇත. එමෙන්ම ගුවන් මගීන්ට සිදුවන අපහසුතාවයන් හා ගුවන් ගමන් වාරවල තිබෙන තදබදය අවම කරමින් පැය 08ක කාලසීමාවක් ගුවන්තොටුපල වසා දැමීමට තිරණය කල බව ගුවන්තොටුපල බලධාරින් අවධාරණය කරයි. දැනට දිනකට ගුවන්වාර 175 පමණ සිදු කරනු ලබන අතර, බොහෝ වාණිජ ගුවන්තොටුපල මෙහෙයුම් කාලය ගුවන්තොටුපල විවෘතව තබන කාලය වන පෙ.ව. 8.30 සිට ප.ව. 4.30 දක්වා ගැනෙන සේ සකස් කොට තිබේ.
ශ්‍රි ලංකා ගුවන් තොටුපල හා ගුවන් සේවා සමාගම මෙසේ ගුවන් තොටුපල වසාදැමීම හේතුවෙන් එය භාවිත කරන්නන් හට සිදුවන බලපෑම අවම කිරිම සදහා සියළු පියවර ගෙන ඇති අතර ගුවන්තොටුපල පරික්ෂා කිරිමේ කවුළුව ගුවන් ගමන් සදහා සැලසුම් කල කාලයට පැයකට පෙර වසා තැබීමේ ක්‍රමවේදය දැඩි ලෙස ක්‍රියාත්මක කරන බැවින්, පැය 05කට පෙර ගුවන්තොටුපලට පැමිණෙන ලෙස ගුවන් මගීන්ගෙන් කාරුණිකව ඉල්ලා සිටී. එමෙන්ම ගුවන් මගින් සමග පැමිණෙන්නන්ගේ සංඛ්‍යාව හැකිතාක් අඩුකරන ලෙසද ඉල්ලා සිටි.
බලාපොරොත්තු විරහිත වාහන තදබදයක් ඇතිවීම වැළැක්වීම සදහා ගුවන්තොටුපල වෙත කල්වේලා ඇතිව පැමිණෙන ලෙස සියළු ගුවන් තොටුපල භාවිතා කරන්නන්ගෙන් ඉල්ලා සිටිනු ලැබේ. ඉහත සදහන් කාලසීමාවේදි ගුවන්තොටුපල අසල හා ඒ අවට විශේෂ රථවාහන සැලැස්මක් ශ්‍රි ලංකා පොලිසිය විසින් ක්‍රියාත්මක කරනු ලැබේ. සියලු වාහන නියම කොට ඇති ගුවන්තොටුපල වාහන නැවතුම් අංගනවල නතර කළ යුතු අතර රථවාහන තදබදයක් ඇතිවිය හැකි බැවින් වෙනත් ස්ථාවල වාහන නතර කිරිමෙන් වළකින ලෙස රියදුරන් හට දැඩිව අවවාද කරනු ලැබේ.
ඇති විය හැකි අපහසුතා මගහරවාගනු පිණිස විදේශ රැකියා සදහා පිටත්වන ශ්‍රි ලංකිකයන් හට ගුවන්තොටුපලට පැමිණිමට පෙර ශ්‍රි ලංකා විදේශ සේවා නියුක්ති කාර්යංශයේ ප්‍රධාන කාර්යාලයේ හෝ දිවයින පුරා පිහිටා ඇති එහි ශාඛාවල ලියාපදංචි වන ලෙස කාරුණිකව ඉල්ලා සිටිනු ලැබේ. මෙය 2016 නොවැම්බර් 01 සිට එබදු විදේශගත වන මගින් සදහා අනිවාර්ය අවශ්‍යතාවක් වන අතර, ගුවන්තොටුපල, ශ්‍රි ලංකා විදේශ සේවා නියුක්ති කාර්යංශ කාර්යාලයේදි සිදු කරන්නේ ලියකියවිලි පරික්ෂා කිරිම පමණි.
මෙම ප්‍රතිසංස්කරණ කටයුතු චීන සමාගමක් වන කැතික් (ඛතික්) සමාගම විසින් සිදු කරනු ලබන අතර ප්‍රතිසංවර්ධන ව්‍යාපෘතිය සඳහා ඇමරිකානු ඩොලර් මිලියන 48ක් වැයවන බව අමාත්‍යාංශය පවසයි.
මෙම ප්‍රතිසංවර්ධන කටයුතු ආරම්භ කිරීමේ අවස්ථාවට සහභාගි වෙමින් ප්‍රවාහන හා සිවිල් ගුවන් සේවා අමාත්‍ය නිමල් සිරිපාල ද සිල්වා මහතා : ප්‍රවාහන හා සිවිල් ගුවන් සේවා අමාත්‍යවරයා ලෙස මාගේ කාලය තුළ මෙම ජාත්‍යන්තර ගුවන් තොටුපළේ ධාවන පථයේ සංවර්ධන කටයුතු ආරම්භ කිරීමට ලැබීම සතුටට කාරණයක්. මෙම ගුවන් තොටුපළ තවදුරටත් මේ තත්ත්වයේ පැවැති නම් ජාත්‍යන්තර මට්ටමින් අපේ ගුව්න තෙුටපළට හිමි තත්ත්වය පහළ යාමට සිදුවී තිබුණා. ඒනිසා මෙම සංවර්ධන කටයුතු කඩිනමින් සිදු කිරීමට තීරණය කරනු ලැබුවා. ඒ අනුව මාස 03ක් ඇතුළත මෙම ධාවන පථයේ ප්‍රතිසංවර්ධන කටයුතු නිම කිරීමට කටයුතු කරන බව මා පවසනවා. මෙම සංවර්ධන කටයුතුවලට අමතරව ලබන අප්‍රියේල් මාසයේදී ගුවන් තොටුපළේ දෙවන පර්යන්ත ගොඩනැගිල්ලේ ඉදිකිරීම් කටයුතුද ආරම්භ කිරීමට සියලු සැලසුම් යොදා තියෙනවා.
මෙම ගුවන් තොටුපළ සංවර්ධනයට සමගාමීව මත්තල ගුවන් තොටුපළට ගුවන් යානා ගෙන්වා ගැනීම සඳහා විශේෂ වැඩ පිළිවෙළක් සැකසීමට ජාත්‍යන්තර ගුවන් සමාගම් සමඟ සාකච්ඡා කර තියෙනවා. දෙවන ගුවන් තොටුපළක් ශ්‍රී ලංකාවට තිබීම ජාත්‍යන්තර ගුවන් සේවා හා සංසංන්දනය කිරීමේදී ඉතාම අවශ්‍යතාවයක්. ඉදිරියේදී මත්තල ගුවන් තොටුපළද අපට වැදගත් ගුවන් තොටුපළක් ලෙස භාවිතා කිරීමට හැකි වෙනවා. නව ගුවන් තොටුපළ පර්යන්තය ඉදිකිරීමෙන් අනතුරුව වසරකට ගුවන් මගීන් මිලියන 20 කට නවීන පහසුකම් සහිතව සේවා සැපයීමට අපට හැකියාව ලැබෙනවා.
ඒ අනුව ශ්‍රී ලංකාවේ සංචාරක ප්‍රවර්ධනයට විශාල රුකුලක් ලැබෙව බව මා විශ්වාස කරනවා. ඉදිරියේදී ජාතික රජය විසින් ගුවන් සේවා ක්ෂේත්‍රෙය් විශාල සංවර්ධන කටයුතු රාශීයක් ආරම්භ කිරීමට නියමිතව තිබෙන බවද අමාත්‍යවරයා මෙහිදී පැවසීය.
මෙම ව්‍යාපෘතියේ ඉදිකිරීම් කටයුතු ආරම්භ කිරීම ප්‍රවාහන හා සිවිල් ගුවන් සේවා අමාත්‍ය නිමල් සිරිපාල ද සිල්වා, නියෝජ්‍ය අමාත්‍ය අශෝක් අබේසිංහ යන අමාත්‍යවරුන්ගේ ප්‍රධානත්වයෙන් සිදු කෙරුණ අතර එම අවස්ථාවට අමාත්‍යාංශ ලේකම් නිහාල් සෝමවීර, ගුවන් තොටුපළ සමාගමේ සභාපති සමන් එදිරිවීර ඇතුළු නිළධාරීන් හා චීන කොන්ත්‍රාත් සමාගමේ නියෝජිතයන් පිරිසක්ද සහභාගි වුහ.
