මෙහිදි මෙම භට පිරිස් විසින් කළුතර, ගම්පහ, රත්නපුර හා කොළඹ යන දිස්ත්‍රික්කයන්හි ගංවතුරට හසුව සිටි පුද්ගලයින් හා සතුන් රාශියක්ම බේරා ගනු ලැබූ බවත් මෙම තත්ත්වය හේතුවෙන් මරණයට පත්වූ ඇතැම් පුද්ගලයින්ගේ සිරුරු සොයා ඔවුන්ගේ ඥාතීනට භාරදුන් බවත් ජලය බැසයාම අවහිර වී තිබූ සමහර ස්ථාන ශුද්ධ පවිත්‍ර කර ඉක්මනින් ජලය බැසයාම සඳහා අවශ්‍ය ක්‍රියාමාර්ග ගනු ලැබූ බවත් පැවසීය.
මෙහිදී නාවික හමුදාව විසින් සිදු කරනු ලබන කාර්යභාරය පිළිබඳ විස්තර කළ නාවික හමුදා මාධ්‍ය ප්‍රකාශක කමාන්ඩර් කෝසල වර්ණකුලසූරිය මහතා නාවික හමුදාව සතුව කුඩා යාත්‍රා විශාල සංඛ්‍යාවක් තිබෙන බවත් යුද්ධයෙන් පසුව රටේ ඇති විය හැකි මෙවැනි ස්වාභාවික ආපදා අවස්ථාවන්හිදී ප්‍රයෝජනයට ගැනීම සඳහා නාවික භට පිරිස් යොදා 2011 වසරේදී ක්ෂණික මුදවා ගැනීමේ බල ඝනයක් ස්ථාපනය කරන ලද බවද පවසා සිටි අතර මේ සඳහා 200ක පමණ පිරිසක් පුහුණු කරනු ලැබූ බවද පවසා සිටියේය.
එහි දෙවන බල ඝනය පසුගිය වසරේදී කළුතර ප්‍රදේශයේ ස්ථාපනය කළ බව පැවසූ වර්ණකුලසූරිය මහතා එය මෙවර ආපදා අවස්ථාවේදී පුද්ගල ජීවිත හා දේපල බේරා ගැනීම සදහා සුවිශේෂී දායකත්වයක් සැපයූ බවද අනාවරණය කර සිටියේය. ඒ අනුව මෙම ආපදා තත්ත්වය ඇති වූ දින පටන් අද වන විට පුද්ගලයන් 404 දෙනෙකුගේ ජීවිත බේරා ගැනීමට හැකි වූ බවත් තවත් 214 දෙනෙකු ආරක්ෂිත ස්ථාන කරා ගෙනයාමට මෙම භට පිරිස්වලට හැකිවූ බවද වැඩිදුරටත් පැවසීය.
ගුවන් හමුදාව විසින් බෙල් 412 වර්ගයේ ගුවන් යානයක් හා එම්.අයි. 24 වර්ගයේ ගුවන් යානයක් සහන කටයුතු සඳහා යෙදවූ බව පැවසූ ගුවන් හමුදා මාධ්‍ය ප්‍රකාශක වින්ග් කමාන්ඩර් ගිහාන් සෙනවිරත්න මහතා ඒ මගින් ආපදාවට ලක්වූවන් බේරා ගැනීම සඳහා අවශ්‍ය බෝට්ටු හා වෙනත් ද්‍රව්‍ය ප්‍රවාහනය කරනු ලැබූ බවත් එසේම අවතැන්වී සිටියවුනට අවශ්‍ය කෑම හා පානීය ජලය බෙදාහැරීමේ කටයුතු සිදු කරන ලද බවත් පවසා සිටියේය. එසේම මේ වන විටත් ඕනෑම අවස්ථාවක භාවිතයට ගැනීම සඳහා එක් ගුවන් යානයක් සුදානම් ව තිබෙන බවද සෙනවිරත්න මහතා වැඩිදුරටත් පවසා සිටියේය.
HC/mod
