රජයේ ප්‍රවෘත්ති දෙපාර්තමේන්තුවේ අද (19) පැවති විශේෂ මාධ්‍ය සාකච්ඡාවකට එක්වෙමින් ඒ මහතා මේ බව පැවසීය.

මැතිවරණ කොමිසමේ සභාපතිවරයා සඳහන් කළ පරිදි 1981 අංක 2 දරන ජනාධිපතිවරයා තෝරාපත් කරගැනීමේ විශේෂ විධිවිධාන පනතේ 8 (අ) වගන්තියට අනුව සහ 1981 අංක 15 දරන ජනාධිපතිවරයා තෝරා පත්කර ගැනීම පිළිබඳ පනතේ තුන්වන උපලේඛනයට අනුව, අපේක්ෂකයෙකුට ඡන්දය සලකුණු කළ යුත්තේ අංක 1 යෙදීමෙනි. එසේම කිසියම් අපේක්ෂකයෙකුට මනාප සලකුණු කිරීමට අපේක්ෂා කරන්නේ නම්, දෙවන මනාපය 2 ඉලක්කම සටහන් කිරීමෙන් ද, තුන්වන මනාපය 3 ඉලක්කම සටහන් කිරීමෙන් ද ලබාදිය හැකි බව හෙතෙම පැවසීය.

මේ 1 ඉලක්කම වෙනුවට යම්කිසි අයෙක් X සලකුණ යොදන්න අදහස් කරන්නේ නම්, ඒ ඡන්දයත් මේ ඡන්ද විමසීමේ දී වලංගු ඡන්දයක් විදියට පිළිගන්නා බවද පැවසීය.

කිසිම අපේක්ෂකයෙකුට ඡන්දය සලකුණු කර නොමැති වීම / එක් අපේක්ෂකයෙකුට වඩා කතිර සලකුණු කර තිබීම/ කතිර (X) සහ ඉලක්කම් දෙවර්ගයම සලකුණු කර තිබීම/ දෙවනි මනාපය සහ තුන්වැනි මනාපය පමණක් සලකුණු කර තිබීම/ ඡන්දදායකයාගේ නම හෝ හඳුනාගත හැකි යමක් ලියා තිබීම/ 6. 1, 2, 3ට වඩා මනාප සලකුණු කර තිබීම ඡන්ද පත්‍රිකාව අවලංගු වීමට හේතු වශයෙන් ඒ මහතා පැහැදිළි කළේය.