ඒ අනුව පළමු අදියර යටතේ පොදු මගී ප්‍රවාහන වාහන, විශේෂ කාර්ය වාහන සහ අනෙකුත් යාන්ත්‍රික නොවන මෝටර් රථ අමතර කොටස් ආනයනය සඳහා 2024 ඔක්තෝබර් 1 වැනිදා සිට අවසර දෙන අතර දෙවැනි අදියර යටතේ වාණිජමය හෝ භාණ්ඩ ප්‍රවාහන කටයුතු වෙනුවෙන් භාවිත කරන වාහන ආනයනය සඳහා 2024 දෙසැම්බර් 1 වැනිදා සිට අවසර දෙනු ලබයි. තුන්වන අදියර යටතේ පුද්ගලික භාවිත මෝටර් වාහන (මෝටර් රථ, වෑන්, ක්‍රීඩා මාදිලියේ වාහන ආදිය ඇතුළුව) ආනයනය සඳහා 2025 පෙබරවාරි 1 වැනිදා සිට අවසර දෙනු ලැබේ.
මෙරට ආර්ථිකය ප්‍රකෘතිමත් කිරීමේ ක්‍රියාමාර්ග සහ ජාත්‍යන්තර මූල්‍ය අරමුදල සමඟ වන වැඩසටහන යටතේ වර්තමානයේ රටතුළ පවතින ආර්ථික හා පාරිසරික සාධක සලකා බැලීමෙන් අනතුරුව ආණ්ඩුව මෙම තහනම ඉවත් කිරීමට තීරණය කර තිබේ. වැඩිදුරටත් අදහස් දක්වමින් අමාත්‍යවරයා පැවසුවේ වාහන ආනයනය සීමා කර තිබුණද, විටින් විට අවශ්‍යතාව මත වාහන ආනයනය කිරීම සිදු කළ බවත්, උදාහරණයක් ලෙස පසුගිය වසරේදී සංචාරක කර්මාන්තය සඳහා අවශ්‍ය වාහන ආනයන කිරීමට ඉඩ ලබා දුන් බවයි.
