ඒ මහතා මේ බව ප්‍රකාශ කළේ අද රජයේ ප්‍රවෘත්ති දෙපාර්තමේන්තුවේ පැවති අමාත්‍ය මණ්ඩල තීරණ දැනුම් දීමේ මාධ්‍ය සාකච්ඡාවේ දී ය.
රට ගොඩගැනීමේ ප්‍රධාන සැලැස්මෙහි අරමුණු අතර ප්‍රධානතම අරමුණ වන දේශීය නිෂ්පාදන වැඩි කිරීම සඳහා කෘෂිකාර්මික ක්ෂේත්‍රය නවීකරණය කර එමඟින් කෘෂිකර්මාන්තයේ නිමැවුම වැඩි කිරීමටත්, එම නිමැවුම වඩා ඵලදායි ලෙස යොදා ගැනීමටත්, ඌණ උපයෝජන සහිත ඉඩම් කඩිනමින් කෘෂි කාර්මික කටයුතු සඳහා යොදා ගැනීමටත්, එම කෘෂි භෝග වැඩි ප්‍රමාණයක් අපනයන වෙළඳපොළට යොදාගැනීමටත්, අපනයනය සඳහා යොදාගැනීමට නම් එය අපනයන සඳහා ප්‍රමුඛතාවය ලබා දීමටත් අදාළ වන ලෙස සියලුම අංශ ඒකාබද්ධ කර ගත් වැඩසටහනක් ජනාධිපති ලේකම් කාර්යාලය හා කෘෂිකර්ම අමාත්‍යංශයත් ඒ හා සම්බන්ධ අනිකුත් අමාත්‍යංශ ද එක්ව මෙම වැඩසටහන ක්‍රියාත්මක කිරීමට කටයුතු කරන බව හෙතෙම පැවසීය.
ඒ අනුව, අලුත් නවීකරණ කටයුතු භාවිතා කරමින් කෘෂිකාර්මික කටයුතු සිදු කිරීම, මෙම ක්ෂේත්‍රය සඳහා තොරතුරු තාක්‍ෂණය යොදාගැනීමට කටයුතු කිරීම හා කෘෂි ව්‍යවසායකයින් බිහි කිරීම මෙහි අරමුණ වෙන බවත්, ඒ සඳහා ජනාධිපති රනිල් වික්‍රමසිංහ මහතා විසින් ඉදිරිපත් කරන ලද යෝජනාවට කැබිනට් මණ්ඩලයේ අනුමැතිය හිමිව ඇති බව අමාත්‍යවරයා සඳහන් කළේය.
ඒ අනුව, 2048 වසර වන විට සංවර්ධිත ශ්‍රී ලංකාවක් ගොඩනැඟීමේ කටයුත්තට කෘෂිකාර්මික ක්ෂේත්‍රයේ දායකත්වය ලබා ගැනීමට ක්ෂේත්‍රයින්ගේ ප්‍රවීණයන්ගේ සහභාගිත්වයෙන් ජාතික ප්‍රතිපත්ති රාමුවක් සැකසීම, කෘෂිකාර්මික අංශ නවීකරණය සඳහා ලේකම් කාර්යාලයක් ජනාධිපති කාර්යාලය යටතේ ස්ථාපිත කිරීම, ප්‍රාදේශීය ලේකම් කොට්ඨාස මට්ටමින් “කෘෂිකාර්මික අංශ නවීකරණ සේවා හා දැනුම් කේන්ද්‍රස්ථාන” ස්ථාපිත කිරීම හා යෝජිත වැඩසටහන් ක්‍රියාත්මක කිරීමට ගොවිජන සංවර්ධන පනත ඇතුළු අනෙකුත් අදාළ නීතිමය සංශෝධනයන් සිදු කිරීම යන පියවරයන් ජනාධිපතිවරයා විසින් ඉදිරිපත් කරන ලද යෝජනාවේ අන්තර්ගත වන බවත් හෙතෙම වැඩිදුරටත් සඳහන් කළේය.
