මධ්‍යම හා ඉහළ මධ්‍යම පාංතිකයන් වෙනුවෙන් ක්‍රියාත්මක නිවාස ව්‍යාපෘති 9 යේ ඉදිකිරීම් කටයුතු නැවත ආරම්භ කළ බව නාගරික සංවර්ධන හා නිවාස අමාත්‍යංශය පවසයි.
මාකුඹුර, මාලබේ, බොරලැස්ගමුව, ස්ටේඩියම්ගම, ඔරුගොඩවත්ත අදියර 1 හා 2, පෑලියගොඩ අදියර 1හා 2, අනුරාධපුර ප්‍රදේශවල මෙම නිවාස ව්‍යාපෘති ඉදිකෙරේ.
මෙම නිවාස ව්‍යාපෘති 9 නිවාස ඒකක 2918 කින් සමන්විතවේ. ඉකුත් 2021 වසරේදී මෙම නිවාස ව්‍යාපෘති ඉදිකිරීම ආරම්භ කර තිබේ. එහෙත් ආර්ථික අර්බුද සහ වෙනත් හේතු නිසාවෙන් මෙම නිවාස ව්‍යාපෘතිවල ඉදිකිරීම් කටයුතු නතර විය.
නාගරික සංවර්ධන හා නිවාස අමාත්‍ය ප්‍රසන්න රණතුංග මහතාගේ උපදෙස් පරිදි නාගරික සංවර්ධන අධිකාරිය හා රාජ්‍ය ඉංජිනේරු සංස්ථාව මෙම නිවාස ව්‍යාපෘති සැලසුම් කිරීමේ හා ක්‍රියාත්මක කිරීමේ කටයුතු සිදුකරනු ලබයි.නිදන කාමර දෙකකින් සමන්විත නිවසක් විශාලාත්වය වර්ග අඩි 700 කි. නිදන කාමර තුනකින් සමන්විත නිවසක විශාලත්වය වර්ග අඩි 900කි.
නාගරික සංවර්ධන හා නිවාස අමාත්‍ය ප්‍රසන්න රණතුංග මහතා පවසන්නේ නැඟී එන මධ්‍යම පාන්තිකයන්ගේ ආදායම් තත්ත්වයට සරිලන පරිදි මෙම නිවාස ඉදිකෙරෙන බවයි. ඒ අනුව මධ්‍යම ආදායම්ලාභී කාණ්ඩයට නිවාස සඳහා ප්‍රවේශ වීමට ඇති බාධක ඉවත් කිරීම සහ රැකියා ස්ථානයන්ට පහසුවෙන් ළඟාවෙමින් නාගරික ප්‍රදේශවල පදිංචිවීමට මධ්‍යම ආදායම්ලාභීන්ට හැකියාව ලැබෙන බවද අමාත්‍යවරයා පවසයි.
නාගරික සංවර්ධන අධිකාරිය විසින් පෙර විකුණුම් පදනම යටතේ මෙම නිවාස ව්‍යාපෘති ඉදිකරනු ලබයි. නිවාස මිලදී ගැනීම සඳහා අවශ්‍ය බැංකු පහසුකම්ද නාගරික සංවර්ධන අධිකාරියේ මැදිහත්වීම මත සිදුකෙරේ.
ඒ අනුව මාළබේ, මාකුඹුර, බොරලැස්ගමුව හා ඔරුගොඩවත්ත නිවාස ව්‍යාපෘති වල නිවාස කිහිපයක් සඳහා දැනටමත් මුදල් ගෙවා අවසන් බවද එම අධිකාරිය පවසයි.
