වසර 35 කට අධික කාලයක්, පරම්පරා 3ක්‌ පමණ ශ්‍රී ලංකාවේ පාපැදි නිෂ්පාදනයේ ප්‍රමුඛතම ආයතනයක් වන ලුමාලා පාපැදි නිෂ්පාදන සමාගමේ විශේෂ නිරීක්ෂණයක් සඳහා ප්‍රවාහන, මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන මහතා එක් විය.
දේශීය සහ විදේශීය වෙළෙඳපොළ අරමුණු කර ගනිමින් වාර්ෂිකව පාපැදි ඒකක 500,000 කට අධික ප්‍රමාණයක් නිපදවන ලුමාලා සමාගම විසින් නිෂ්පාදනය කරනු ලබන විදුලි පා පැදි (e-bike) පිලිබඳ මෙහිදී අමාත්‍යවරයාගේ විශේෂ අවධානය යොමු විය.
ආයතනයේ විවිධ අංශ වල දායකත්වයෙන් දේශීය වශයෙන් නිපදවන මෙම පාපැදි කර්මාන්තශාලාවේ එක් එක් අංශ මගින් සිදුකරන කාර්භාරය මෙහිදී අමාත්‍යවරයා විසින් නිරීක්ෂණය කරන ලදී.
කිලෝමීටරයකට රුපියලකටත් වඩා අඩු පිරිවැයක් යටතේ එක් ආරෝපණ වාරයකින් කිලෝ මීටර් 100ක පමණ ධාවනය කළ හැකි විදුලි පාපැදි ඇතුලු මාදිලි රැසක් ලුමාලා ආයතන විසින් නිෂ්පාදනය කරනු ලබයි.
මෙම තාක්ෂණය යටතේ සාමාන්‍ය විදුලි පාපැදි, සංචාරකයින් සඳහා විශේෂයෙන් නිර්මාණය කරන ලද ද්විත්ව ආසන සහිත විදුලි පාපැදි, ඉවතලන ප්ලාස්ටික් බෝතල් ඇතුළු සැහැල්ලු කසළ එකතු කළ හැකි විශේෂ විදුලි පාපැදි, විදුලියෙන් ක්‍රියාත්මක වන රෝද පුටු, මගීන් ප්‍රවාහනය සඳහා ආසන සහිතව සකස් කළ විදුලි පාපැදි, අයිස් ක්‍රීම්, රස කැවිලි වැනි ජංගම අලෙවි කටයුතු සඳහා නිෂ්පාදනය කරන ලද විදුලි පාපැදි ඇතුළු නිෂ්පාදන මාදිලි රැසක් හදුන්වා දී ඇති අතර ඉල්ලුම අනුව මහා පරිමාණයෙන් එම පාපැදි නිෂ්පාදනය කිරීමේ හැකියාව ද ආයතනය සතු වේ.
මෙරට මෙන්ම එක්සත් රාජධානිය, යුරෝපය, ඉන්දියාව, එක්සත් අරාබි එමීර් රාජ්‍යය, මැද පෙරදිග රාජ්‍යයන් ඇතුළු රටවල් රැසකට මෙම විදුලි පාපැදි සඳහා ඉහළ ඉල්ලුමක් පවතින බව බවද ආයතනයේ කළමනාකාරීත්වය විසින් අමාත්‍යවරයා දැනුවත් කරන ලදී.
" රට වෙනුවෙන් විශාල නිෂ්පාදනයක් සිදු කරන මෙවැනි ආයතනවල කාර්යභාරය පිළිබඳව ජනතාව තවදුරටත් පුළුල් ලෙස දැනුවත් වීම අත්‍යවශ්‍යයි. කර්මාන්තයක් ලෙස මෙවැනි ආයතන සිදු කරන සේවය රට දැකිය යුතුයි. වේගා වැනි නවොත්පාදන ආයතන සිදු කරන සේවය පිළිබඳවත් විශාල ජනතා අවධානයක් ලබා දීමට අප කටයුතු කළා. මෙවැනි ආයතන පිළිබඳවත් එවැනි සැලසුම් සහගත වැඩපිළිවෙළක් සකස් කිරීම අවශ්‍යයයි. ඒ වෙනුවෙන් මාධ්‍ය ආයතන වල ද දායකත්වය ලබා ගනිමින් කටයුතු කිරීම තුලින් වැඩි පිරිසක් මේ පිළිබඳව දැනුවත් වනු ඇති. විශේෂයෙන්ම විදුලි පාපැදි භාවිතය තුළින් ආයතනයේ නිලධාරීන් සිදු කරන මූල්‍ය සහ ඉන්ධන ඉතිරි කිරීම පිළිබඳව සහ එහි පවතින වාසිදායක ප්‍රතිලාභ පිළිබඳව ජනතාව දැනුවත් කිරීම ඉතාමත් ප්‍රයෝජනවත්. ෆොසිල ඉන්ධන වෙනුවට විදුලි බලය භාවිතා කරමින් අවම පිරිවැයක් යටතේ ප්‍රවාහන පහසුකම් සපයා ගැනීමට හැකිවීම පවතින මූල්‍ය අර්බුදය හමුවේ රටට ඉතාමත් ඵලදායි විකල්ප වැඩපිළිවෙළක් බවට පත්වනු ඇති. "
ලුමාලා ආයතනයේ අධ්‍යක්ෂ ප්‍රධාන විධායක නිලධාරි තාරික් මිෆ්ලාල්, කළමනාකාර අධ්‍යක්ෂ අසීම් මිෆ්ලාල්, සාමාන්‍යාධිකාරි රංජිත් සිරිවර්ධන යන මහත්වරුන් ඇතුළු පිරිසක් මෙම නිරීක්ෂණ චාරිකාව සඳහා එක්ව සිටියහ.
