රජයේ ප්‍රවෘත්ති දෙපාර්තමේන්තු පරිශ්‍රයේ අද (04) පැවති කැබිනට් තීරණ දැනුම් දීමේ මාධ්‍ය හමුවේ දී ඒ මහතා එළැඹෙන අය වැය සම්බන්ධයෙන් අදහස් දක්වමින් මේ බව පැවසීය.
ඉදිරි වසරේ රජයේ පුනරාවර්ථන වියදම රුපියල් බිලියන 4637 හා ප්‍රාග්ධන වියදම රුපියල් බිලියන 3245ක් බවත්, ඒ අනුව ඇස්තමේන්තු කොට තිබෙන සම්පූර්ණ රාජ්‍ය වියදම රුපියල් බිලියන 7,885ක් බවත්, අමාත්‍යවරයා පැවසීය. 2022 වර්ෂය සඳහා නැවත නැවතත් දැරිය යුතු පුනරාවර්ථන වියදම සළකා 2023 අයවැයේදී කුමන ආකාරයකට බදු ගැලපීම් කළත් උපයාගත හැකි වන්නේ මෙයින් හරි අඩක් පමණක් බවත්, රටේ ජනතාව පිළිගතයුතු යථාර්තය මෙය බවත්, ජනමාධ්‍ය අමාත්‍යවරයා පැවසීය.
රජ්‍ය සේවක වැටුප් හා විශ්‍රාම වැටුප්, රජය මගින් ගෙවන සමුද්ධි ඇතුළු සහනාධාර, රාජ්‍ය ණය සඳහා පොළී ගෙවීම්, සඳහා විශාල වියදමක් දැරීමට සිදුවන බවත්, එවැනි වියදම් පියවීමට ආදායමක් මෙරට කිසිම මොහොතක ඇති නොවූ බවත්, හැම වසරකම ජංගම ගිණුමේ හිඟයක් ඇති බවත්, එයට රුපියල් බිලියන 3245ක් එකතු කිරීමෙන් විශාල අයවැය පරතරයක් ඇතිවන බවත්, අමාත්‍යවරයා පැවසීය.
මෙම පරතරය පියවීමට 1977 න් පසුව මෙරට තිබූ සෑම ආණ්ඩුවක්ම ණය ලබාගත් බවත් දේශීය හා විදේශීය වශයෙන් ගෙන ඇති එම ණය අඛණ්ඩව ණය හා පොළී ලෙස ගෙවීම් සිදුකළ බවත්, එය ගෙවීමට නොහැකි අවස්ථාවලදී ගත් ණය ගෙවීමට තවත් ණය ගත් බවත්, පැවති කොවිඩ් තත්වය යටතේ ආදායම් හිඟ වී ගත් ණය ගෙවාගැනීමට නොහැකි වූ බවත්, අමාත්‍යවරයා වැඩිදුරටත් පැවසීය.
බහු පාර්ශවික ණය ගෙවීම මේ වන විටත් සිදුවන නමුත් ද්වී පාර්ශවික ණය ගෙවීම නවතා ඇති බවත්, එය ගෙවීමට සුදුසු ආකරයට සම්බන්ධයෙන් සාකච්ඡා කරමින් සිටින බවත් ආචාර්ය බන්දුල ගුණවර්ධන මහතා පැවසීය.
රජයේ සේවකයන්ට වැටුප් ගෙවීම වැනි ඒවා නවත්වා වියදම අඩු කරගැනීමට නොහැකි බවත්, එමෙන්ම සංවර්ධන ව්‍යාපෘති නවත්වා සංවර්ධන වියදම් අවම කර මුදල් ඉතිරිකරගැනීමට හැකියාවක් නොමැති බවත්, එසේ වුවහොත් එහි බලපෑම ජනතාවට බවත්, බන්දුල ගුණවර්ධන අමාත්‍යවරයා පැවසීය.
මෙවර අයවැය විසර්ජන කෙටුම්පත සකස් කර ඇත්තේ හැකි තරම් ප්‍රමාණයකට ප්‍රාග්ධන වියදම් අඩුකරමින් බවත්, පුනරාවර්ථන වියදමට වඩා ප්‍රාග්ධන වියදම අඩු බවත්, රජයේ ආදායම් ලැබීම් පුනරාවර්ථන වියදම්වලට වඩා අඩු බවත්, අර්ථීක බිඳවැටීමට දේශපාලන උත්තරයක් නොමැති බවත්, ඇත්තේ අර්ථීක විද්‍යාත්මක උත්තරයක් පමණක් බවත්, අමාත්‍යවරයා පැවසීය.
