වසර 35 කට වඩා වැඩි සේවා කාලයක් වෘත්තීය සමිති ක්ෂේත්‍රයේ නියුක්තව සිටි වෘත්තීය සමිති නායකයින් ඇගයීම මෙම උළෙලේදී සිදු කෙරෙන බව මේ සම්බන්ධයෙන් අදහස් දැක්වූ කම්කරු අමාත්‍ය නිමල් සිරිපාල ද සිල්වා මහතා පැවසීය.
අමාත්‍යවරයා පෙන්වා දුන්නේ, මෙම සම්මාන උත්සවයේදී වෘත්තීය සමිති නායකයින් දස දෙනෙකු හා රජයේ සේවයේ නියුතුව සිට දැනට විශ්‍රාම සුවයේ පසුවන රාජ්‍ය නිලධාරීන් දෙදෙනෙකු ඇගයීමට ලක්කෙරෙන බවයි.
මේ සම්බන්ධයෙන් වැඩිදුරටත් අදහස් දැක්වූ කම්කරු අමාත්‍ය නිමල් සිරිපාල ද සිල්වා මහතා කියා සිටියේ 1994 -1998 දක්වා වූ කාලයේ දී එවක කම්කරු හා වෘත්තීය පුහුණු අමාත්‍යවරයාව සිටි මහින්ද රාජපක්ෂ මහතාගේ
සංකල්පයකට අනුව පාර්ලිමේන්තු පනතකින් ස්ථාපිත කරන ලද ආයතනයක් වන ශ්‍රම වාසනා අරමුදල විසින් මෙම සම්මාන උළෙල මුල් වරට පවත්වා ඇත්තේ මීට අවුරුදු 13 කට පෙර එනම් 2008 වර්ෂයේ දී බවයි. අමාත්‍යවරයා පෙන්වා දෙන්නේ අඩසිය වසක මෙහෙවරක යෙදුණු වෘත්තීය සමිති නායකයන්ට එදා මුල්වරට හිටපු ජනාධිපති මහින්ද රාජපක්ෂ මහතා අතින් සම්මාන හා උපහාර පිරිනැමීමට කටයුතු කිරීම ලාංකීය කම්කරු ව්‍යාපාරය තුළ සිදුකළ විශිෂ්ඨ සහ ඓතිහාසික කාර්යයක් බවයි. එදා සිදුකළ එම කාර්යය ජාත්‍යන්තර කම්කරු සංවිධානයේ පවා සාකච්ඡාවට බඳුන්වී ප්‍රසාදය දිනාගත් අවස්ථාවක් විය.
එදා පැවැති සම්මාන උළෙලේදී ද වෘත්තීය සමිති නායකයන් 10 දෙනෙකු සඳහා සම්මාන පිරිනැමුණු නමුත් ප්‍රබල වෘත්තීය සමිති නායකයකු වූ බාලා තම්පෝ මහතා වෙත පිරිනැමුණු සම්මානය ඒ මහතා විසින්
ප්‍රතික්ෂේප කිරීම ද සුවිසේෂී සිදුවීමක් විය. වෘත්තීය සමිති නායකයන් වෙත රජය විසින් සම්මාන ප්‍රදානය කිරීම එදා එක් පුවත්පතක් වාර්තා කර තිබුණේ මෙසේය.
“ යා දෙක නොරත රත - එකට පෑහීමක් ද නැත, යන ප්‍රකට කියමන ආණ්ඩු සහ වෘත්තීය සමිති ව්‍යාපාර ගැන කතා කිරීමේදී වඩා හොඳින් ගැළපේ. මන්ද ලෝකයේ කුමන රටක කුමන ආණ්ඩුවක් වුවද වෘත්තීය සමිති ව්‍යාපාරයට සහ එහි නායකයන් ට දක්වා ඇත්තේ යහපත් ප්‍රතිචාර නොවේ.
ලංකාව තුළ ද විවිධ කාලවල බලයට පැමීණි විවිධ ආණ්ඩු වෘත්තීය සමිති මර්දනය කරන්නට, වෘත්තීය සමිති නායකයන් මර්දනය කරන්නට විවිධ පියවර ගෙන ඇත. සොච්චම් වැටුප් වර්ධකයක් ඉල්ලා වැඩ වර්ජනය කළ කම්කරුවන් ලක්ෂයකට අධික පිරිසක් රස්සාවලින් එළියට දමන්නටත්,කම්කරු නායක සෝමපාල සහෝදරයා ඝාතනය කරන්නටත් එවකට පැවැති එජාප ආණ්ඩුව කටයුතු කළ බව ඉතිහාසය දන්නෝ හොඳ හැටි දනිති.
කම්කරු පන්තියේ ඉල්ලීම් ලබාදීමට වෘත්තීය සටන්වල මූලිකත්වය ගෙන කටයුතු කළ කම්කරු නායකයන්ට අවසානයේ ඉතිරිවූයේ මහමග පමණි.ඔවුන් කළ සටන් මගින් දිනාගත් අයිතීන් තවත් සිය දහස් ගණනක් බුක්ති වින්දද එම අයිතීන් ලබා දීමට කටයුතු කළ නායකයන්ගේ සේවයවත් ඇගයීමට කිසිවකු නොවීම ඛේදවාචකයකි.” එවන් වාතාවරණයක කම්කරු නායකයන් ඇගයීමට මහින්ද රාජපක්ෂ මහතා නායකත්වය දැරූ රජය ඒ අවස්ථාවේ කටයුතු කිරීම පිළිබඳව එම පුවත්පත එහිදී සිය ප්‍රසංශාව පළ කර තිබුණි.
සේව්‍ය,සේවක සහ රජය යන ත්‍රෛපාර්ෂවීය සහයෝගීතාව ශක්තිමත් කිරීම තුළින් රටේ ආර්ථික සංවර්ධනය ළඟා කර ගැනීමට මෙවැනි ඇගයීම් තුළින් අවස්ථාව උදාවෙයි.
වසර 13 කට පසුව නැවත මෙම සම්මාන උළෙල පැවැත්වීම සතුටට කරුණක් බව පැවසූ කම්කරු අමාත්‍ය නිමල් සිරිපාල ද සිල්වා මහතා වැඩිදුරටත් පෙන්වා දෙන්නේ මෙම සම්මාන ප්‍රදානය සඳහා වෘත්තීය සමිති නායකයන් දස දෙනා තෝරා ගැනීමේදී පුවත්පත් දැන්වීම් පළ කොට අයදුම්පත් කැඳවා විධිමත් පරිදි එම කටයුත්ත සිදු කර ඇති බවයි.
ඒ අනුව, මෙවර ‘ශ්‍රමයට අභිමන් ජනතා බුහුමන්’ සම්මාන උළෙලේදී අග්‍රාමාත්‍ය මහින්ද රාජපක්ෂ මහතා අතින් සම්මාන ලබන වෘත්තීය සමිති නායකයන් වන්නේ,
01. ලෙස්ලි ෂෙල්ටන් දේවේන්ද්‍ර - ශ්‍රී ලංකා නිදහස් සේවක සංගමය
02. මෙරෙඤ්ඤගේ දයාරත්න මුණිදාස ප්‍රනාන්දු - සමස්ත ලංකා එක්සත් මෝටර් කම්කරු සංගමය
03. සුප්පයියා සුබ්‍රමනියම් රාමනාදන් - Joined Plantation Trade Union
04. හේව අමරතුංග පියදාස - සමස්ත ලංකා වෙළඳ හා කර්මාන්ත කම්කරු සංගමය
05. රෙන්ගසාමි පලනිමුත්තු - Ceylon Workers Congress
06. විජේවන්ත පද්මසිරි අමරසිංහ - ලංකා වතු සේවක සංගමය
07. රෙංගය්යා මරුදමුත්ත ක්‍රිෂ්ණසාමි - කෘෂිකාර්මික හා වතු කම්කරු සංගමය
08. අරුමුගම් මුතුලිංගම් - United Plantation Workers Union
09. තුවාන් මන්සූර් රහීම් රසිඩීන් - සිලෝන් ෆෙඩරේෂන් ඔෆ් ලේබර්
10. වරාහේන ලියනගේ දොන් ඇන්ටන් මාකස් - නිදහස් වෙළඳ කලාප සහ පොදු සේවා සේවක සංගමය
මෙම සම්මාන උළෙලේදී උපහාර ලබන වෘත්තීය සමිති නායකයන්ට සමරු ඵලකයක්,පදක්කමක් සහ රුපියල් එක්ලක්ෂ පනස් දහසක මූල්‍ය ප්‍රදානයක් ලබාදීමට නියමිතය.
මීට අමතරව මෙම සම්මාන උළෙලේදී කම්කරු අමාත්‍යාංශයේ හිටපු ලේකම්වරයකු වන මහින්ද මඩිහහේවා සහ හිටපු කම්කරු කොමසාරිස් ජනරාල්වරයකු වූ ජී.වීරකොන් යන මහත්වරුන් වෙත විශේෂ ඇගයීම් සම්මාන ප්‍රදානය කිරීම ද සිදුකෙරෙන අතර මෙම මාහැඟි අවස්ථාවට වැඩකරන ජනතාවගේ උණුසුම් සුබ පැතුම් පිරිනැමිමට අපි සියලු දෙනා මෙය අවස්ථාවක් කර ගනිමු.
සරත් කලුගමගේ
මාධ්‍ය නිලධාරී
කම්කරු අමාත්‍යාංශය
