''සුරකිමු ගංගා ''වැඩ සටහන යටතේ ලබන වසරේ දී ක්‍රියාත්මක කළ යුතු ව්‍යාපෘති හදුනාගැනීම පිළිබඳ සාකච්ඡාවක් පසුගිය සතියේ පරිසර අමාත්‍යාංශයේ දී පැවැත්විනි.

එහිදී අදහස් පළ කළ අමාත්‍යවරයා;

'' සුරකිමු ගංගා'' වැඩ සටහන සඳහා ඉදිරි වසරට රුපියල් මිලියන 2000ක මුදලක් රජය මගින් වෙන් කර ඇති බව සඳහන් කළේය. අපේ රටේ ගංගා පද්ධතිය සංරක්ෂණය කිරීම රජයේ ඉළක්කයයි. ඒ නිසා මෙම මුදල් උපරිම වශයෙන් යොදා ගනිමින් ගංගා පද්ධතිය සංරක්ෂණය කිරීම සඳහා නව ව්‍යාපෘති යෝජනා කරන්නැයි ද අමාත්‍යවරයා ඉල්ලීමක් කළේය. මෙවර අයවැය මගින් අමාත්‍යාංශ සඳහා විශාල වශයෙන් මුදල් වෙන් කිරීමට රජය කටයුතු යොදා තිබේ.
අමාත්‍යාංශ වෙත වෙන් කර ඇති මුදල් කාර්තු හතරකට බෙදා එක් එක් කාර්තුව තුළ වියදම් කිරීමට නියමිත මුදල් වැය කළ යුතු ව ඇත.

ඊළඟ කාර්තුවට නියමිත මුදල අමාත්‍යාංශයට ලැබෙන්නේ මුල් කාර්තුවේ මුදල් සම්පූර්ණයෙන්ම වැය කළොත් පමණකි. එමනිසා අදාල කාර්තුවට වෙන් කරන ලද මුදල් අනිවාර්යයෙන්ම ඒ ඒ ව්‍යාපෘති සඳහා වැය කළ යුතු බවත් අමාත්‍යවරයා සඳහන් කළේය.

සුරකිමු ගංගා වැඩ සටහනට රුපියල් මිලියන 2000ක් ලබා දෙන ලෙස මවිසින් කරන ලද ඉල්ලීම අනුව මුදල් අමාත්‍යතුමා අවශ්‍ය මුදල් ලබා දී තිබෙනවා. එමනිසා 2022 වසරේ පළමු කාර්තුව තුළ අපි අනිවාර්යයෙන්ම රුපියල් මිලියන 500ක් වැය කළ යුතුයි. ඒක පහසු කාර්යයක් නොවෙයි. එම නිසා සියලු නිලධාරින්ට පැය විසිහතර පුරාම තමන්ට පැවරී ඇති රාජකාරි නොපමාව ඉටු කළ යුතුව තිබෙනවා.

කොවිඩ් 19 වසංගත තත්ත්වය වැඩ නොකර සිටීමට නිදහසට කාරණයක් නොවෙයි. 2021 වර්ෂයේ විශාල කාල පරිච්ඡේදයක් කොවිඩ් 19 වසංගත තත්ත්වය නිසා රට වසා දැමීමට සිදු වුනා. ඒ නිසා යම් යම් අතපසුවීම් සිදු වුනා. නමුත් තවදුරටත් කොවිඩ් 19 වසංගත තත්ත්වය වැඩ නොකර සිටීමට හේතුවක් කර නොගත යුතුයි. එහෙම ඉන්න අපිට යුතුකමකුත් නැහැ. රටේ පවතින තත්ත්වය අපි සැළකිල්ලට ගත යුතුයි. රට ගොඩ ගන්න නම් අපි හැමෝම එකට එක්ව වැඩ කළ යුතුයි.

එමනිසා ලබන වසර සඳහා අපිට ලබා දී ඇති මුදල් වන රුපියල් මිලියන 2000ක මුදල මෙන්ම 2021 වසර සඳහා වෙන් කර තිබු මුදලින් රුපියල් මිලියන 400ක් ඇතුළුව රුපියල් මිලියන 2400ක් අපිට මේ වසර තුළ වැය කළ යුතුව තිබෙනවා. යැයි ද අමාත්‍යවරයා අවධාරණය කළේය.
ලබන වසරේ අමතර මුදල් ප්‍රතිපාදන සතයක්වත් ලැබෙන්නේ නැහැ. අමාත්‍යාංශවලට උපරිම වශයෙන් මුදල් ප්‍රතිපාදන ලබා දී තිබෙනවා. ඒ නිසා අපිට දී ඇති මුදල් වැය කිරීමට අපි වග බලා ගත යුතුයි. අපි මේ වසරේ කැලණි, වළවේ හා මැණික් යන ගංගා සඳහා ප්‍රමුඛත්වය ලබා දිය යුතුයි. අනෙක් ගංගා ආශ්‍රිත ව්‍යාපෘති සඳහා මුදල් ප්‍රතිපාදන ලබා දෙනවා. නමුත් කැලණි ගඟ පිරිසිදු කිරීමේ කටයුතුවලට ප්‍රමුඛත්වය ලබා දිය යුතුයැයි ද අමාත්‍යවරයා සඳහන් කළේය.