"HIV ආසාදනය පිළිබඳ අනියත බියක්" හේතුවෙන් අධ්‍යාපනය කඩාකප්පල් වූ කුලියාපිටිය දරුවා සම්බන්ධව පසුගිය වකවානුවේ සමාජය තුළ වැඩි අවධානයක් යොමු වී තිබුණි.
ඇතැම් පළාත් අධ්‍යාපන බලධාරීන්ගේ නොසැලකිල්ල සහ වගකීමකින් තොර ක්‍රියාකලාප හේතුවෙන් අසාධාරණයට ලක් වූ මෙම සිසු දරුවාගේ අධ්‍යාපන කටයුතු බාධාවකින් තොරව පවත්වාගෙන යාමට අවශ්‍ය කටයුතු සිදුකිරීමට අධ්‍යාපන අමාත්‍ය අකිල විරාජ් කාරියවසම් මහතා සෘජුවම මැදිහත් විය.
ඒ අනුව මෙම සිසු දරුවාගේ ඉදිරි අධ්‍යාපන කටයුතු සාර්ථකව සිදු කර ගෙන යාම සඳහා පාසලක් ලබාදීමටත් පාසල ආසන්නයෙන්ම නිවසක් ලබාදීමටත් අධ්‍යාපන අමාත්‍යාංශය පියවර ගනු ලැබුවේ අධ්‍යාපන අමාත්‍ය අකිල විරාජ් කාරියවසම් මහතාගේ සෘජු උපදෙස් මතයි.
මෙම නිවසේ කුලී මුදල 2016 වසරේ මාර්තු මාසයේ සිට වාර්ෂිකව ලබාදීමට අබාන්ස් ආයතනය ඉදිරිපත් වී සිටින අතර සමාජ සංවේදී සිදුවීම්වලදී මානුෂීයව මැදිහත්වීම පිළිබඳ පුද්ගලිකවම අබාන්ස් ආයතනයට තමා ස්තූතිවන්ත වන බව මෙහි දී අමාත්‍යවරයා සඳහන් කළේය.
මෙම අවස්ථාවට අධ්‍යාපන රාජ්‍ය අමාත්‍ය වී. රාධක්‍රිෂ්ණන් මහතා ද එක්ව සිටියේය
