දේශීය ප්‍රභේද සමඟ දෙමුහුන් කරන ලද නව ගම්මිරිස් වර්ග තුනක් කෘෂිකාර්මික අංශයට දායාද කිරීම වෙනුවෙන් මෙම සම්මානය ඔහුට හිමි විය.
බූටෑවේ රාළ , කොහුකුඹුරේ රාළ හා ඩිංගි රාළ යන දේශීය විරුවන්ගේ නමින් මෙම නව ගම්මිරිස් ප්‍රභේද නම් කර තිබේ. ජාත්‍යන්තර වෙළදපළේ දී ඉහළ ගුණාත්මයෙන් යුතු දේශීය ගම්මිරිස් ප්‍රභේදවල අවශ්‍යතාවය සපුරාලිය හැකිවීම මෙන්ම ලංකාවේ පාරිසරික තත්ත්වයන්ට වඩා හොදින් ගැලපීම මෙම නව ගම්මිරිස් ප්‍රභේදවල තිබෙන විශේෂතා වේ.
මෙම කෘෂිකාර්මික පර්යේෂණවල විශිෂ්ටතා වෙනුවෙන් සම්මාන පිරිනැමීමේ ජාතික උළෙල වසර දෙකකට වරක් පවත්වනු ලබන අතර මෙවර එය සිව්වෙනි වතාවට පවත්වා තිබේ. වැවිලි අංශය, වැවිලි නොවන අංශය, පශු සම්පත් හා ධීවර යන අංශ තුන යටතේ මෙහිදී සම්මාන ප්‍රදානය කිරීම සිදු කෙරේ. කෘෂිකර්ම අමාත්‍යංශයට අයත් ශ්‍රී ලංකා කෘෂිකාර්මික පර්යේෂණ ප්‍රතිපත්ති සභාව මගින් මෙම සම්මාන උළෙල සංවිධානය කරනු ලබයි. කෘෂිකාර්මික ක්ෂේත්‍රයට අදාළ පර්යේෂණ සිදු කරන පර්යේෂකයන් දිරිමත් කිරීමේ අරමුණින් මෙම සම්මාන උළෙල පවත්වනු ලබන බව කෘෂිකාර්මික පර්යේෂණ ප්‍රතිපත්ති සභාව පවසයි.
මෙම අවස්ථාවට කෘෂිකර්ම අමාත්‍යංශ ලේකම් බී . විජේරත්න, ප්‍රාථමික කර්මාන්ත අමාත්‍යංශ ලේකම් බන්දුල වික්‍රමආරච්චි, කෘෂිකර්ම රාජ්‍ය ලේකම් ඩි. වි. බන්ධුලසේන, අපනයන කෘෂිකර්ම අධ්‍යක්ෂ ජනරාල් ආචාර්ය ඒ . පි. හීන්කෙන්ද මහතා ඇතුළු රාජ්‍ය නිලධාරිහු රැසක් සහභාගි වුහ.
