මෙරට තේ නිෂ්පාදන මිලදී ගන්නා ප්‍රධානතම රටක් ව රුසියාවට යැවූ බහාලුමක කප්රා නැමැති කෘමියකු සිටි බව කියමින් රුසියානු රජය පසුගිය 18 දා සිට ශ්‍රී ලංකාවේ තේ සඳහා මාස 6 ක තාවකාලික තහනමක් පැනවු අතර ඒ සම්බන්ධයෙන් පළමුව තානාපති කාර්යාලය හරහා සාකච්ඡා පවත්වා රුසියානු බලාධාරීන් සමඟ සාකච්ඡා පැවැත්වීමට පියවර ගෙන තිබුණි.
එහි ප්‍රතිඵලයක් ලෙස පසුගියදා මේ පිළිබඳව නිරීක්ෂණය කිරීමට නීතිපති දෙපාර්තමේන්තුව, තේ මණ්ඩලය සහ කෘෂිකර්ම දෙපාර්තමේන්තුව නියෝජනය කරමින් නව දෙනෙකු ගෙන් යුතු ශ්‍රී ලාංකීය තාක්ෂණික කමිටුවක් රුසියානු රජයේ බලධාරීන් සමඟ සාකච්ඡා පැවැත්වීම සඳහා පිටත් වූ අතර එහි ප්‍රතිඵලයක් ලෙස තේ තහනම ඉවත් කර ගැනීමට හැකි විය.
විශේෂයෙන් ම ඉදිරියේ දී ශ්‍රී ලාංකීය තේ අපනයනය කිරීමේ දී ''සිලෝන් ටී'' නාමයට හානි නොවීම සඳහා තේ වල ගුණාත්මකභාවය මෙන්ම පිරිසිදුභාවය පිළිබඳව කටයුතු කිරීමට පියවර ගන්නා බවත් එසේම මෙම කණ්ඩායම විසින් එරට ශ්‍රී ලාංකීය තේ ගබඩා නිරීක්ෂණය කළ අතර තවදුරටත් මෙරට තේ ගබඩාවන්හි පිරිසිදුභාවය පිළිබඳ ද ඉතාමත් සැලකිළිමත් වීමට පියවර ගන්නා බවත් අමාත්‍යවරයා පැවසීය.
