ව්‍යවහාරික මනෝ විද්‍යාව පිළිඳ ජාත්‍යන්තර සමුළුව අමාත්‍යවරයාගේ ප්‍රධානත්වයෙන් කොළඹ දී අද (25) ආරම්භ වූ අතර එහිදී අමාත්‍යරවයා මේ බව සඳහන් කළේය. රටවල් 15 ක නියෝජිතයින් මෙම සමුළුවට එක්ව සිටින අතර හෙට (26) සහ අනිද්දා (27) දිනවලද මෙම සමුළුව පැවැත්වේ.
දිවයින පුරා දිස්ත්‍රික්කවලට මානසික විශේෂඥ වෛද්‍යවරුන් 25 ක් පත් කිරීමට අමාත්‍යාංශය තීරණය කර තිබෙන බවත් ඒ සදහා මානසික සෞඛ්‍ය පිළිබඳ සියලුම වෛද්‍යවරුන් ඒකරාශී වී සිටීම ඉතාම වැදගත් බවත් අමාත්‍යවරයා පෙන්වා දුන්නේය.
වසර 30 ක් පුරා පැවැති යුද්ධය , සුනාම් ඛේදවාචකය වැනි හේතු නිසා ශ්‍රී ලාංකිකයින් දැඩි මානසික පීඩනයන්ට ලක් වූ අතර එම පිරිසගේ මනස සුවපත් කිරීමට කටයුතු කළ යුතු බව ද ඒ මහතා පෙන්වා දුන්නේය.
" මානසික සෞඛ්‍ය සේවාව ශ්‍රී ලංකාවට ඉතාම වැදගත් ක්ෂේත්‍රයක් බව මම ප්‍රකාශ කරනවා. දියුණු ලෝකය තුල මානසික ප්‍රශ්ණ සහ මානසික අසහනය මෙන්ම මානසික ආසාධාරණත්වය ද දැකිය හැකියි. ශ්‍රී ලංකාව තුල මානසික අසාධාරණත්වය, දේශපාලනය සහ සංස්කෘතිය තුලින් ද දැකිය හැකි වෙනවා. තරුණ පරපුර විරැකියාව හේතුවෙන් මානසික ප්‍රශ්ණ වලට මුහුණ දී සිටීම ද තවත් ගැටලුවක්.” බව ද අමාත්‍යවරයා වැඩිදුරටත් පැවසීය.
මෙම අවස්ථාවට සුප්‍රකට ඇමරිකානු මනෝවිද්‍යාඥ මහාචාර්ය මාර්ටින් සෙලිග්මන්ගේ මහතා ඇතුලු සෞඛ්‍ය අමාත්‍යාංශයේ නිලධාරීන් රැසක් එක්ව සිටියහ.
