ඒ අනුව මේ වනවිට වෙරළ තීරයේ ඇති අත්හැර දමන ලද හා භාවිතයට නොගන්නා ධීවර බෝට්ටු, ඔරු හා වෙනත් ජලය එක්රැස්විය හැකි උපකරණ සොයා බලා ඒවා ජලය එක්රැස් නොවන පරිදි ආවරණය කිරීමට හෝ විනාශ කර දැමීමට හෝ බැහැර කිරීමට හෝ පියවර ගන්නා ලෙස අමාත්‍ය මහින්ද අමරවීර මහතා ,ධීවර අධ්‍යක්ෂ ජනරාල් ක්‍රිස්ටිලාල් ප්‍රනාන්දු මහතා හට උපදෙස් දෙනු ලැබීය.
මේ වනවිට නිරිත දිග මෝසම සක්‍රිය ව තිබෙන බැවින් කඩින් කඩ වැටෙන මඳ වැස්ස මෙන්ම අව්ව ද ඩෙංගු රෝගය හිස එසවීමට හේතුවී තිබේ. එමෙන්ම වෙරළ තීරයේ ඇති අත්හැර දමන ලද ධීවර යාත්‍රා, ඔරු හා ජලය එක්රැස්විය හැකි උපකරණ ඩෙංගු කීටයින් බහුල මදුරු ආකර බවට පත්වී ඇති බව පෙනී ගොස් තිබේ.
එමනිසා මෙම පියවර වහාම ක්‍රියාත්මක කරන්නැයි අමාත්‍යවරයා උපදෙස් දෙන ලදී. එමෙන්ම වෙරළ තීරයේ ඇති ජලය එක්රැස්විය හැකි ස්ථාන සොයා බලා ඒවා ඉවත් කිරිම හා විනාශ කිරීමේ මදුරු මර්දන දිනයක් මෙම මාසය තුළ ක්‍රියාත්මක කිරීමට පියවර ගන්නැයි ද අමාත්‍යවරයා අධ්‍යක්ෂ ජනරාල්වරයාට උපදෙස් දෙනු ලැබීය. මෙම කටයුතු ධීවර නිලධාරින් මගින් ධීවර ප්‍රජාවට දැනුම් දී ඔවුන් මගින් ඉටු කිරිමට පියවර ගන්නා ලෙස ද ඇමැතිවරයා උපදෙස් දී තිබේ
