අනුරාධපුර දිස්ත්‍රික් පාර්ලිමේන්තු මන්ත්‍රීවරයෙකු ලෙස 1994 අගෝස්තු මස 16 වැනි දින පැවති මහ මැතිවරණයෙන් මුලින්ම පාර්ලිමේන්තුවට තේරීපත් වූ තිස්ස කරල්ලියද්ද මහතා 1993 දී මුලින්ම සිය දේශපාලන කටයුතු ආරම්භ කළේ මැදවච්චිය ඇතාකඩ ශ්‍රී බෝධිමළු විහාරස්ථානයට ගොස් ආශිර්වාද ලබා ගනිමිනි. ඒ අනුව පාර්ලිමේන්තු දිවියට වසර 20ක් සපිරීමට සමගාමීව ඒ මහතාගේ සහභාගීත්වයෙන් පැවති ප්‍රධාන ආගමික වැඩසටහන ද එම විහාරස්ථානයේ දී පසුගියදා සිදුකෙරිණි.
හැත්තෑව දශකයේ සමගි පෙරමුණ රජයේ දහනම වතාවක් අගමැති ධුරයෙහි වැඩ බලමින් ද, මැදවච්චිය ආසනයේ මහජන නියෝජිතයා ලෙස නොකඩවා වසර 47ක් පාර්ලිමේන්තුව නියෝජනය කරමින් ද ලෝක වාර්තාවකට හිමිකම් කී රජරට අසහාය දේශපාලන නායකයා ලෙස අදත් ජනතාවගේ ගෞරවාදරයට පත් දිවංගත මෛත්‍රීපාල සේනානායක මහතාගේ ආශිර්වාදයෙන් තිස්ස කරල්ලියද්ද මහතා දේශපාලනයට පිවිසියේ ය.
1994 වසරේ මෙන්ම 2000, 2001, 2004 සහ 2010 වසරවල පැවති මහ මැතිවරණයන්ගෙන් ද ජයග්‍රහණය ලැබූ කරල්ලියද්ද මහතා මීට පෙර සෞඛ්‍ය හා දේශීය වෛද්‍ය නියෝජ්‍ය අමාත්‍ය, ඉඩම් හා දේශීය වෛද්‍ය අමාත්‍ය, දේශීය වෛද්‍ය අමාත්‍ය සහ ආගමික කටයුතු නියෝජ්‍ය ආමාත්‍ය ධුරයන් දරනු ලැබී ය.
අමාත්‍ය තිස්ස කරල්ලියද්ද මහතාගේ පාර්ලිමේන්තු දිවියට වසර 20ක් සපිරීම නිමිත්තෙන් අනුරාධපුර ප්‍රජා සෞඛ්‍ය සංවර්ධන නිලධාරීන්ගේ සංගමය සංවිධානය කර ඇති ප්‍රධාන උපහාර උත්සවය මේ මස 30 අනුරාධපුර සමූපකාර ශ්‍රවණාගාරයේ දී පැවැත්වීමට නියමිතය.
ECB
