2025 වසරේ දී හෙක්ටයාර 161,067ක් රතු වී සඳහා වගා කර ඇති අතර 2025 මහා කන්නයේ අපේක්ෂිත වී අස්වැන්න මෙට්‍රික් ටොන් 648,216ක් පමණ වනු ඇති බවත්, එහි සාමාන්‍ය අගය ලෙස වී අස්වැන්න හෙක්ටයාරයකට කිලෝ 4,000ක් වනු ඇති බවත් ඒ අනුව, 2025 වසරට රතු සහල් හිඟය වීමට හේතුවක් නොමැති බවත් වෙළෙඳ, වාණිජ, ආහාර සුරක්ෂිතතා සහ සමූපකාර අමාත්‍ය වසන්ත සමරසිංහ මහතා සඳහන් කරයි.
වෙළඳපොළේ පවතින රතු සහල් හිඟය පිළිබඳව මාධ්‍ය වෙත නිවේදනයක් නිකුත් කරමින් ඒ මහතා මේ බව ප්‍රකාශ කළේය.
පසුගිය වසර තුළ යල සහ මහා කන්න වගා කිරීම හෙක්ටයාර 277,315 ක් රතු වී වගා කිරීමට යොදා ගෙන තිබෙන අතර එමඟින් වී මෙට්‍රික් ටොන් මිලියන 1.1ක් අස්වැන්න ලැබී තිබෙන බවත්, හෙතෙම මෙහි දී සඳහන් කළේය.
විශේෂයෙන් රතු සහල් වගා කිරීම සිදුකරන්නේ මාතර, ගාල්ල, හම්බන්තොට යන දකුණු පළාත් ප්‍රදේශ වල සහ නැගෙනහිර පළාත තුළ වේ.
රතු සහල් වගා කරන ප්‍රදේශවල වී මෝල් ගබඩා ආදිය පිළිබඳ සමීක්ෂණයක් සිදු කළ බව සඳහන් කළ අමාත්‍යවරයා පසුගිය කාලයේ සිටි ආණ්ඩු විසින් සිදු කළ අමනොඥ ක්‍රියාවන් හේතුවෙන් මෙම තත්ත්වය ඇති වී තිබෙන බවත් සඳහන් කළේය.
ඉන්දියාවේ ද රතු සහල් මිල වැඩිවීමක් තිබෙන බවත්, ඉන්දියාවෙන් රතු සහල් ගෙන්වීමේ දී නැව් ගාස්තු රහිතව රතු සහල් මෙට්‍රික් ටොන් එකක මිල ඩොලර් 600ක් පමණ වන බවත්, නමුත් ආණ්ඩුව වශයෙන් ඉන්දියාව සමඟත් සාකච්ඡා කර රතු සහල් මෙට්‍රික් ටොන් 7,500ක් ආනයනය කිරීමට අදාළ ටෙන්ඩර් කැඳවීම ද STC ආයතනය හරහා සිදු කර තිබෙන බවත්, ඒ සඳහා සැපයුම්කරුවන් සොයාගැනීම සඳහා ඉන්දියානු තානාපති කාර්යාලය ද මැදිහත්වීම සිදු කර තිබෙන බවත්, අමාත්‍යවරයා මෙහි දී වැඩිදුරටත් සඳහන් කළේය.
