එම අවස්ථාවට රාජ්‍ය ආරක්ෂක ලේකම් ගෝඨාභය රාජපක්ෂ මහතා, පරිසරවේදීන්, විශ්වවිද්‍යාල සිසුන් හා කලාකරුවන් බොහෝමයක් ද සහභාගිවීමට නියමිත බව ද රාහුල ස්වාමීන් වහන්සේ පැවසූහ. මේ සම්බන්ධ ව වැඩිදුර අදහස් දැක් වූ උන්වහන්සේ; රෝස තිරුවානා සහ සුදු තිරුවානා නිධි ඇති නාමල් උයනේ ශාක, පස, භූගෝලීය විශේෂතා ආදිය පිළිබඳ ව රජරට විශ්වවිද්‍යාලයේ ශිෂ්‍යාවක විසින් කරන ලද පර්යේෂණ නිබන්ධයක් හා සංයුක්ත තැටියක් ද මෙම උත්සවයේ දී දොරට වැඩීම සිදු කෙරේ. නාමල් උයන 25 වන සැමරුම වෙනුවෙන් නිවාස නොමැති නමුත් නිවාස සාදා ගැනීමේ උත්සාහයක් ඇති 25 දෙනෙකු වෙනුවෙන් ඊට අධාර සැපයීම ද නිල වශයෙන් සිදු කිරීමට නියමිත ය. ඉහත නිවාස 25න් දැනටමත් එක් නිවසක වැඩ අවසන් කර ඇති බව ත් විදේශිකයන්ගේ ආධාර ද මේ සඳහා ලැබී ඇති බවත් උන්වහන්සේ පැවසූහ.
කාලයේ වැලිතලාවට වැසීගිය අනාදිමත් ඉතිහාසයක් ඇති නාමල් උයන සොයාගෙන ජාතියට පූජා කර දැනට ගත වූ වසර 25ක කාලය තුළ විවිධ බාධක අභියෝග පැමිණිය ද ඒවා කිසිවකට යටත් නො වී තම කශේරුකාව ඍජු ව තබාගෙන වැඩ කළ බව ද තම ඉතිරි ජීවිත කාලය ද ඒ වෙනුවෙන් කැප කරන බව ද උන්වහන්සේ ප්‍රකාශ කළහ.
අනුරාධපුර දිස්ත්‍රික්කයට අයත් කැකිරාව ආසනයේ පලාගල ප්‍රාදේශීය ලේකම් කොට්ඨාසයේ පිහිටා තිබෙන නාමල් උයන 'රක්ෂිත වනයක්' බවට පත් කිරීමට ජනාධිපතිතුමා පියවර ගෙන ඇති බවත් ඒ වෙනුවෙන් විශේෂයෙන් ස්තුතිය පළ කර සිටින බවත් උන්වහන්සේ පැවසූහ. එසේ ම නාමල් උයනට ජාතික හා ජාත්‍යන්තර ප්‍රසිද්ධිය ලබා දීම වෙනුවෙන් සියලු ම ජනමාධ්‍යවලට උන්වහන්සේ ස්තුතිය පුද කර සිටියහ.
KHJ/SDF
