කොළඹින් දුර බැහැර ප්‍රදේශවල ද ජාතික නිදහස් දින උළෙලවල් පැවැත්වීමේ රජයේ වැඩපිළිවෙළ යටතේ එළැඹෙන 2015 වසරට යෙදෙන 67වැනි ජාතික නිදහස් දින උළෙල හම්බන්තොට දිස්ත්‍රික්කයේ වීරකැටිය මහින්ද රාජපක්ෂ මධ්‍ය මහා විද්‍යාල පරිශ්‍රය ආශ්‍රිත ව පැවැත්වීමට තීරණය කොට ඇත.
මේ සඳහා වන සංවර්ධන කටයුතු ක්‍රියාත්මක කිරීම මෙන් ම උත්සව අවස්ථාවට ගැළපෙන පරිදි සංවර්ධන ව්‍යාපෘති ක්‍රියාත්මක කිරීමට අදාළව ඊයේ (05) රාජ්‍ය පරිපාලන හා ස්වදේශ කටයුතු අමාත්‍ය ඩබ්.ඩී.ජේ. සෙනවිරත්න මහතාගේ ප්‍රධානත්වයෙන් වීරකැටිය ප්‍රාදේශීය ලේකම් කාර්යාල පරිශ්‍රයේදී විශේෂ සාකච්ඡාවක් ද පැවැත්විණි.
මෙහිදී අමාත්‍යවරයා ප්‍රමුඛ නිලධාරීහු එම ප්‍රදේශයේ නිරීක්ෂණ චාරිකාවක ද නිරත වෙමින් ජාතික නිදහස් දින උළෙලට සමගාමී ව ක්‍රියාත්මක කළ යුතු සංවර්ධන ව්‍යාපෘති පිළිබඳ සොයා බැලූහ.
රාජ්‍ය පරිපාලන හා ස්වදේශ කටයුතු නියෝජ්‍ය අමාත්‍ය විජය දහනායක මහතා ද මෙම අවස්ථාවට එක් ව සිටියේය.
DB
