අමාත්‍යවරයා මේ බව පැවසුවේ අද (05) නාරම්මල පැවති ප්‍රධාන අමාත්‍යවරයාගේ සංකල්පය පරිදි ඉදිවෙන නව බුලත්පොළට මුල්ගල තැබීමේ අවස්ථාවට සහභාගී වෙමිනි. මෙහිදී ප්‍රධාන අමාත්‍යවරයා පැවසුවේ, “දේශීය ගැනුම්කරුවන් පමණක් නොව විදේශීය ගැනුම්කරුවන්ට පවා අප වෙත පැමිණ බුලත් මිලදී ගැනීමේ අවස්ථාවක් පළාතේ බුලත් ගොවීන්ට උදාවු බවයි.


එහිදී වැඩිදුරටත් අදහස් දක්වමින් අමාත්‍යවරයා කියා සිටියේ, විශේෂ සංවර්ධන ප්‍රතිපාදන යටතේ සහ දැයට කිරුළ යටතේ විශාල වෙළඳපොළවල් සකසා ගෙන යනවා. වෙනදා තිබෙන වෙළඳපොළවල් නෙමෙයි අද තියෙන්නේ. ඉස්සර වෙළඳපොළවල් අවසන් වුණාම දවස් ගානක් යනවා සුද්ද කරන්න. සමහර වෙලාවට සත්තු අවුස්සලා ජරා වෙලා තියෙන්නේ. වෙළඳපොළේ වැඩ කටයුතු ඉවර වුණා ම, සමිති සමාගම් පවත්වන්න, සංගීත සංදර්ශන පවත්වන්න වගේ දේවල්වලටත් මේ භූමිය යොදා ගන්න පුළුවන්. ඒ ආකාරයේ වෙළඳපොළවල් තමයි අද බිහිවෙන්නේ. ජනාධිපතිතුමාගේ, ගෝඨාභය රාජපක්ෂ මහතාගේ සහ බැසිල් රාජපක්ෂ මහතාගේ සංකල්පය පරිදි මේ නව වෙළඳපොළ සංකල්පය හඳුන්වලා දෙනවා. ඒ අනුව ප්‍රාදේශීය සභාවලට ප්‍රශ්නයක්ව තිබුණු වෙළඳපොළවල් දැවැන්ත විදියට සංවර්ධනය කරනවා. ඒ වෙනුවෙන් ප්‍රාදේශීය සභා සභාපතිවරුන් විශාල කැප කිරීමක් කරනවා. 


ඒ වගේම මිලියන 498ක් වියදම් කර පළාත් සභාවෙන් මුළු වයඹ පළාතේ ම පොළවල් 40ක් මේ අවුරුද්ද ඇතුළත ඉදිකිරීමට කටයුතු කරනවා. මේක බුලත්පොළක්. ග්‍රාමීය මට්ටමින් විශාල ආදායමක් එන තැනක්. ගම්වල බුලත් ගොවීන් ඉන්නවා. වෙළඳපොළ ශක්තිමත් කරන්න  ඔවුන්ට අපි උදව් කරන්න ඕනේ. මම ආසියානු සංවර්ධන බැංකුවත් එක්ක කතා කළා. ලබන ජනවාරි වෙන කොට කුරුණෑගලට කිලෝ මීටර 400කුත්, පුත්තලමට කිලෝ මීටර 200ක් මාර්ග කාපට් කිරීමේ වැඩපිළිවෙළ පටන් ගන්නවා. නාරම්මල ප්‍රදේශයේත් කිලෝ මීටර 35ක් ඉදිවෙනවා. ඒ වගේ ම වයඹ පළාතේ  කිලෝ මීටර 600ක් පමණ මාර්ග සංවර්ධනය කරපු යුගයක් තිබුණා නම් ඒ සියල්ල සිදු වුණේ අපේ පළාත් සභාවෙන් පමණයි. අපි අපේ කාර්යභාර්යය ඒ වෙනුවෙන් හරියට ඉටු කළ යුතුයි.