මහනුවර නගරයේ පානීය ජල අවශ්‍යතාව සහ නාගරික අපජල ව්‍යෘපෘතිය සදහා මේ වන විට රුපියල් මිලියන 3,188 කට ආසන්න මුදලක් වෙන් කර ඇති බව පෙන්වා දුන් රවුෆ් හකීම් අමාත්‍යවරයා එම ව්‍යාපෘති බොහොමයකම වැඩ මේ වන විට ආරම්භ කර ඇති බව පෙන්වා දෙන ලදී. එම ව්‍යාපෘති අතරින් වැඩිම මුදලක් වැයවෙතැයි ඇස්තමේන්තු කොට ඇත්තේ මහනුවර උතුර පාතදුම්බර ජල ව්‍යාපෘතිය සදහාය. එම මුදල රුපියල් මිලියන 33, 400 කි. එහි කොන්ත්‍රාත් ප්‍රදානය කිරීමේ කටයුතු මේ වන විට අත්සන් කොට ඇති අතර, චීනයේ එක්සීම් බැංකුව ආධාර මත මෙම ව්‍යෘපෘතිය ක්‍රියාත්මක කිරීමට යෝජිතය. කුණ්ඩසාලේ හාරගම ජල ව්‍යාපෘතිය සදහා රුපියල් මිලියන 27,495 ක මුදලක් වැයවෙතැයි ඇස්තමේන්තු කොට ඇති අතර, ඉන්දීය එක්සීම් බැංකුව සමග ඊට අවශ්‍ය ගිවිසුම්ද අත්සන් කොට වැඩ ආරම්භ කොට ඇත. මේ ව්‍යාපෘතිය මගින් පාතහේවාහැට ප්‍රදේශයේ පානීය ජල ගැටළුවටද විසදුම් ලැබෙනු ඇත.
මීට අමතරව රුපියල් මිලියන 5,719 ක් වැය කොට හසලක ජල සම්පාදන ව්‍යාපෘතියද මෙම වසරේදී ආරම්භ කෙරෙන අතර, මිලියන 3, 345 ක මුදලක් වැයකොට ක්‍රියාත්මක කිරීමට යෝජිත කොත්මලේ රිවර්සයිඩ් ජල ව්‍යාපෘතියේ කොන්ත්‍රාත් ප්‍රදානය කිරීමටද මේ වන විටත් කටයුතු යොදා තිබේ.
විදේශ ආධාර යටතේ ක්‍රියාත්මක කරන මෙම ව්‍යෘපෘති වලට අමතරව මෙරට මුදල් යොදවා මහනුවර සහ තදාසන්න ජල සම්පාදන ව්‍යාපෘතියද ක්‍රියාත්මක කරමින් පවතින අතර, එහි වැඩකටයුතු වලින් 99% ක් මේ වන විටත් අවසන් කොට ඇත. මීට අමතරව කුණ්ඩසාලේ , ඇල්පිටිය සහ මාරස්සන යන ජල සම්පාදන ක්‍රම වැඩි දියුණු කිරීමටත් ජල සම්පාදන හා ජලාපවාහන මණ්ඩලය කටයුතු යොදා ඇති අතර, ඒ සදහා මේ වන විටත් මිලියන 30 කට ආසන්න මුදලක් වියදම් කොට ඇති බව අමාත්‍යවරයා පෙන්වා දෙන ලදී. මෙම ව්‍යාපෘති වලට අමතරව මහනුවර නගරය ආවරණය වන පරිදි ක්‍රියාත්මක කෙරෙන නාගරික අපජල ව්‍යාපෘතිය සදහා රුපියල් මිලියන 3,078 ක මුදල් වෙන් කොට ඇති අතර, එහි 25% ප්‍රගතියක් මේ වන විටත් අත්පත් කරගෙන තිබේ.
මහනුවර දිස්ත්‍රික් ලේකම් කාර්යාලීය ශ්‍රවනාගාරයේ පැවති මෙම කමිටු රැස්වීම කමිටුවේ සම සභාපතිවරුන් වන මධ්‍යම පළාත් ප්‍රධාන අමාත්‍ය සරත් ඒකනායක සහ පාර්ලිමේන්තු මන්ත්‍රී ලකී ජයවර්ධන යන මහත්වරුන්ගේ ප්‍රධානත්වයෙන් රැස්විය. උසස් අධ්‍යාපන සහ මහාමාර්ග සංවර්ධන අමාත්‍ය ලක්ෂ්මන් කිරිඇල්ල මහතා ඇතුළු තවත් මහජන නියෝජිතයන් රැසක් සහ මහනුවර දිස්ත්‍රික් ලේකම් එච්.එම්.පී හිටිසේකර මහතා ඇතුළු නිලධාරීන් රැසක් සහභාගී වූහ.
AP/DMU-Kandy
