මෙම කරුණු අනාවරණය වූයේ මහනුවර දිස්ත්‍රික් ලේකම් එච්.එම්.පී හිටිසේකර මහතාගේ ප්‍රධානත්වයෙන් පැවති මහනුවර දිස්ත්‍රික් කෘෂිකර්ම කමිටු රැස්වීමේදීය.
අස්වැද්දීමට බලාපොරොත්තු වන මෙම කුඹුරු ඉඩම් වල හැකිතාක් දුරට කාබනික පොහොර භාවිතා කරමින් සාම්ප්‍රදායික වී වගාව සිදු කිරීමට සැළසුම් කොට ඇති බව පැවසූ මූලස්ථාන ගොවිජන සංවර්ධන නිලධාරී ආර්.එස්. ඩබ්. එච්. ආරියරත්න මහතා එසේ වගා කරන වී අස්වැන්නෙන් ලබා ගන්නා සහල් වලට පාරිභෝගික ජනයාගේ ඉල්ලුමක් පවතින බවද පැවසීය. මෙම වගා වැඩසටහන යටතේ වී වගාවට අමතරව වෙනත් වගාවන් සදහාද පුරන්කුඹුරු භාවිතා කිරීමට බලාපොරොත්තු වේ.
මීට අමතරව ගොවිජනතාව වෙත ගොවිජන සංවර්ධන දෙපාර්තමේන්තුවෙන් ලබා දෙන සේවාවන් කාර්යක්ෂම කිරීමේ අරමුණින් නිලධාරීන්ගේ අත්‍යවශ්‍ය පහසුකම් වැඩි දියුණු කිරීමටද සැළසුම් කොට තිබේ. ඒ අනුව මහනුවර දිස්ත්‍රික්කයේ සේවය කරන සෑම කෘෂිකර්ම උපදේශකවරයෙකුටම ලැප්ටොප් පරිගණකයක්, මල්ටි මීඩියා ප්‍රක්ෂේපන යන්ත්‍රයක් සහ ඩිජිටල් කැමරාවක් ලබාදීමට කටයුතු යොදා ඇති අතර, එම උපකරණ යොදා ගෙන කෘෂි උපදේශකවරුන්ට ක්ෂේත්‍ර පර්යේෂණ සහ ගොවිජනතාව දැනුවත් කිරීම් ඇතුළු කාර්යයන් පහසුවෙන් ඉටු කළ හැකිය. අදාල උපකරණ ලබා දීම මේ වසර අවසන් වීමට සිදු කිරීමට කටයුතු යොදා ඇත.
AP/DMU-Kandy
