ඒ අනුව ශීඝ්‍රයෙන් වර්ධනය වන සූර්ය බලශක්තිය හා සම්බන්ධ කර්මාන්ත සඳහා සහාය ලබා දීමේ අරමුණින් විශ්වවිද්‍යාල උපාධි අපේක්ෂකයින්, වෘත්තීය පුහුණු විද්‍යායතනවල සිසුන්, හමුදා සේවයේ හිටපු නිලධාරින්, අ.පො.ස. (උ/පෙළ) සුදුසුකම්ලත් පාසල් අධ්‍යාපනය නිම කළ සිසුන් ඇතුළත් 2,000ක පමණ පිරිසක් සඳහා සූර්ය පැනල නිෂ්පාදනය හා සවි කිරීම, සූර්ය කෝෂ පිළිබඳ පර්යේෂණ හා සංවර්ධන කාර්යයන් සහ සූර්ය තාප බලාගාර පද්ධතීන්ගේ සේවා සැපයීම සම්බන්ධයෙන් පුහුණුවක් සිදු වේ.
පේරාදෙණිය, යාපනය, රුහුණ සහ කැලණිය විශ්වවිද්‍යාලයන්හි අදාළ පර්යේෂණ හා පුහුණු පහසුකම් ස්ථාපනය කිරීම ද සිදු වේ.
වසර 2020 වන විට මෙරට සමස්ත විදුලිබල උත්පාදනයෙන් 20%ක ප්‍රතිශතයක් සාම්ප්‍රදායික නොවන පුනර්ජනනීය බලශක්ති ප්‍රභවයන් වෙතින් ලබාගැනීම රජයේ ප්‍රතිපත්තිය වේ.
ඒ සම්බන්ධයෙන් උසස් ප්‍රායෝගික පුහුණුවක් ලබා දීම සඳහා ඇමරිකා එක්සත් ජනපදයේ ඉලනොයි විශ්වවිද්‍යාලයේ සහ සිවනන්දන් ලැබෝරටරීස් සමාගමේ විශේෂඥ උපදෙස් සහ මාර්ගෝපදේශකත්වය ලබාගැනීම පිණිස අවබෝධතා ගිවිසුම්වලට එළඹීමට විද්‍යා, තාක්ෂණ හා පර්යේෂණ අමාත්‍ය සුසිල් ප්‍රේමජයන්ත මහතා මෙම යෝජනාව අමාත්‍ය මණ්ඩලයට ඉදිරිපත් කළේය.
