“අශෝක කොළඹගේ මහතා ප්‍රතිභාන්විත ගුවන්විදුලි නිර්මාණවේදියෙකි. ගී පද රචකයෙකි. ලේඛකයෙකි. මේ සියල්ල එක්තැන් කොට ගත් කළ අපූරු කලාකරුවෙකි. ඉනිදු නොනැවතී ඔහු දක්ෂ පරිපාලන නිලධාරියෙකි.
ගුවන්විදුලි ඉතිහාසයේ නොමැකෙන සටහන් තැබූ ඩී.එම්. කොළඹගේ නම් වන තම පියාණන්ගේ අඩි පාරේ යමින්, මුලින්ම වැඩසටහන් සම්පාදකවරයකු ලෙස ගුවන්විදුලියට සම්බන්ධ වන කොළඹගේ මහතා එහිදී තම නිර්මාණ කුසලතා, දැනුම මනාව දියුණු කරගත්තේ ය.
ගුවන්විදුලි රඟ මඩලට අපූරු නාට්‍ය රැසක් නිර්මාණය කළ ඔහු, ගුවන්විදුලි නාට්‍ය කලාවේ පදනම ශක්තිමත් කළ නිර්මාණකරුවෙකි. නන්දා මාලිනිය විසින් මුලින්ම ගායනා කළ "බුදු සාදු” ගීතයෙහි පද රචනය නිමවමින් සරල සුගම ගේය පද රචනයේ දස්කම් ද විදහා දැක්වූ ඔහු ග්‍රන්ථකරණයෙහි ද නියැළුණේය.
ගුවන්විදුලියේ සේවය නිමවන ඔහු අනතුරුව පරිපාලන සේවයට බැඳෙන අතර, ඒ හරහා අගනා රාජ්‍ය සේවාවක නිරත වූ ප්‍රාදේශීය ලේකම්වරයෙකු ද වූයේය.
ශ්රී ලාංකේය ගුවන්විදුලි, සාහිත්‍ය කලා ක්ෂේත්‍රයට නොමඳ දායකත්වයක් ලබා දුන් අශෝක කොළඹගේ මහතාගේ අභාවය සම්බන්ධයෙන් මාගේත්, මෛත්‍රී වික්‍රමසිංහ මැතිනියගේත් සාතිශය සංවේගය පළ කරමින් එතුමාට නිවන් සුව අත් වේවා යි ප්‍රාර්ථනා කරමු. “
SDF
