එම කණ්ඩායමේ ප්‍රධානත්වය උසුලන්නේ ආජන්ටිනාවේ තේ විද්‍යායතනයේ අධ්‍යක්ෂ වන දියාගෝ මොර්ලා චෙට්ටි මහතා වන අතර මොහු ලතින් ඇමරිකානු රටවල සහ ශ්‍රී ලංකාවේ තේ ප්‍රචාරණය පිළිබඳ ව ගෞරවනීය තානාපති ලෙස ශ්‍රී ලංකා තේ මණ්ඩලය විසින් මීට ඉහත දී පත් කරන ලදී.
ලතින් ඇමරිකානු දූත කණ්ඩායම පිළිගත් අමාත්‍යතුමා ශ්‍රී ලංකාවේ දේශපාලන තත්ත්වය පිළිබඳ ව මෙන් ම ආර්ථික හා සමාජයීය තත්ත්වය විශේෂයෙන් ම තිස් වසරක් පුරා පැවති කුරිරු ත්‍රස්තවාදී උවදුර මැඬලමින් ශ්‍රී ලංකාව ලබා ඇති ජයග්‍රහණයන් දූත පිරිසට පැහැදිලි කර දුන්නේය. දැනට අප රටේ ආර්ථික වර්ධනය 8%ක් වී ඇති අතර සංචාරක වර්ධනය 300%කින් වර්ධනය වෙමින් ඇති බව ද යටිතල පහසුකම් සහ අනෙකුත් කටයුතු ඉතාමත් ශීඝ්‍රයෙන් පවතින බවත් දුත පිරිසට පෙන්වා දුන්නේය. තේ කර්මාන්තය ගැන ද සාකච්ඡා කළ අමාත්‍යතුමා ලෝකයේ අනර්ඝම තේ නිෂ්පාදනය කරන්නේ ශ්‍රී ලංකාවේ බවත් කිසි ම හේතුවක් මත තේවල ගුණාත්මක බව අඩු නොකරන බවත් මේ නිසා ලෝකයේ අනෙක් තේ නිපදවන රටවලට වඩා ඩොලර් 2කට වඩා වැඩි මිලක් ශ්‍රී ලංකා තේවලට ලැබෙන බවත් පැහැදිලි කළේය.
ශ්‍රී ලංකාවේ තේ තම රටවල හැකිතාක් ප්‍රචලිත කරන මෙන් ද ශ්‍රී ලංකාවේ සංචාරය සඳහා ඔවුන්ගේ රටවල ජනතාව උනන්දු කරන මෙන් ද අමාත්‍යතුමා ඉල්ලා සිටියේය. ඒ ඒ රටවලින් පැමිණි කණ්ඩායම් නියෝජනය කරමින් නියෝජිතයන් අදහස් දැක්වූ අතර ඔවුන් සියලු දෙනා ම ශ්‍රී ලංකාවේ දක්නට ලැබෙන සංවර්ධනය සහ විශේෂ සුන්දරත්වය අගය කොට සලකන ලදී. එමෙන් ම අමාත්‍යතුමාගේ වැඩපිළිවෙළ බෙහෙවින් අගය කරන බව ප්‍රකාශ කළහ. එමෙන් ම තම රටවල තේ ප්‍රචලිත කිරීමට හැකි අයුරින් ක්‍රියාත්මක කරන බවට ද පොරොන්දු වූහ.
NDH
