මීරියබැද්ද ගම අවට පදිංචි කරුවන් මේ වන විට සහන කඳවුරු වෙත යොමු කර ඇති අතර ඔවුන්ට සහන සැපයීම සඳහා කණ්ඩායම් ගණනාවක් ජනාධිපතිතුමාගේ උපදෙස් මත ලබා දී ඇත. මේ වන විටත් ගිලන් රථ, වෛද්‍යවරු, හෙද හෙදියන් ඖෂධ මෙන් ම ආහාරපාන සහ පානීය ජලය වැනි මූලික අවශ්‍යතා කඩිනමින් ලබා දීමට පියවර ගෙන ඇත.
ආපදා කළමනාකරණ අමාත්‍ය මහින්ද අමරවීර මහතා ඇතුළු එම අමාත්‍යංශයේ ඉහළ නිලධාරීන් පිරිසකට වහා ම එම ස්ථානයට ගොස් අවශ්‍ය කටයුතු සොයා බලා ඉටු කරන ලෙස ජනාධිපතිතුමා උපදෙස් දුන් අතර එම පිරිස එම ස්ථානය බලා ගොස් ඇත.
ආපදාවට ලක් වූවන් මුදා ගැනීම සඳහා ත්‍රිවිධ හමුදාව ඇතුළු ආරක්ෂක අංශත්, මහජනතාවත් මේ වනවිටත් යුහුසුළුව කටයුතු කරමින් සිටියත් තව දුරටත් එම ප්‍රදේශයේ පවතින ජලය ගලායාමේ ස්වාභාවය නිසා ආපදාවට ලක් ව සිටින ජනතාව මුදා ගැනීමේ කටයුතු මහත් අසීරුවෙන් සිදු කිරීමට සිදු වී ඇතැයි ආපදා කළමනාකරණ අමාත්‍යංශය පවසයි.
කෙසේ වුවද මෙම ආපදාවට ගොදුරු වූ ජනතාව සම්බන්ධයෙන් රජය ශෝකය පළ කරන අතර එම ජනතාව සඳහා ගත හැකි ඉදිරි සියලුම පියවර ගන්නා බව රජය අවධාරණය කර සිටී.
SDF
