මේ මස 23 වන බ‍්‍රහස්පතින්දා පෙ.ව. 9.45ට වැල්ලවත්ත මිලාජ් හෝටලයේදී මෙම අත්සන් එකතු කිරීමේ වැඩසටහන ආරම්භ කෙරෙන අතර, ඉන් අනතුරු ව ශ‍්‍රී ලංකාව පුරා වෙසෙන ජනතාවට අත්සන ලබාදීමෙන් ඊට දායකත්වය ලබාදීමේ අවස්ථාව ලැබෙනු ඇත.
දශක තුනකට අධික කාලයක් කොටි ත‍්‍රස්තවාදීන්ගෙන් මෙරට ජනතාව පීඩාවිඳි අතර, ඔවුන්ගේ ම්ලේච්ඡත්වය නිසා මෙරට ජනතාව කඳුලින් ගත කළ කාලය අපට අමතක නැත. ජනාධිපති මහින්ද රාජපක්‍ෂ මැතිතුමාගේ අභීත නායකත්වය යටතේ එම කඳුලින් පිරි අඳුරු යුගය නිමා කිරීමට හැකි විය.
එම අභාග්‍ය සම්පන්න යුගය නැවතත් ඇති කිරීම සඳහා ඇතැම් විදේශීය බලවේග උත්සාහ දරමින් සිටිති. එයට සහයදී රට පාවාදීමට ඇතැම් දේශීය පිරිස්ද එකතු වී සිටීම දැඩි ව හෙළා දැකිය යුත්තකි. 1815දී අපේ රටට නිදහස අහිමිවූයේ ද මෙලෙස පාවා දුන් පිරිසක් රට තුළ ක‍්‍රියාත්මක වූ බැවිනි. ඒ ආකාරයට වර්තමානයේද රට පාවාදීමේ කුමන්ත‍්‍රණ මේ වන විටත් දියත් වෙමින් පවතී. යුරෝපා සංගමය විසින් කොටි තහනම ඉවත් කිරීම එහි එක් ප‍්‍රතිඵලයක් යැයිද අමාත්‍යවරයා පෙන්වා දෙයි. මේ තත්ත්වය අවබෝධ කොට ගෙන නිදහස් නිවහල් ඒකීය රටක් ලෙසට ශ‍්‍රී ලංකාව ගොඩ නැංවීම සඳහා අප සියලු දෙනා එක්ව බුද්ධිමත් ව තීරණ ගත යුතු කාලය දැන් එළඹ ඇත.
එබැවින් යුරෝපා සංගමයේ මෙම ක‍්‍රියා කලාපය හෙළා දකිමින් ශ‍්‍රී ලංකීය අප ඊට නිසි ප‍්‍රතිචාර දැක්විය යුතුය. ඒ සඳහා සියලු දෙනා මෙම වැඩසටහනට සම්බන්ධ වී තම අත්සන යොදමින්, ඊට සාමකාමී විරෝධතාවය දක්වන ලෙසට අමාත්‍යවරයා, දේශයට ලැදි ඒකීය රටක් අපේක්ෂා කරන සියලු ජනතාවගෙන් ඉල්ලා සිටියි.
ECB
