මැතිවරණ ප්‍රතිඵල ගණනය කිරීමෙන් පසු ව දිස්ත්‍රික් ලේකම් විසින් එම ප්‍රතිඵල මැතිවරණ මහලේකම් කාර්යාලය වෙත එවනු ලබයි. එම ප්‍රතිඵල නැවත විමර්ශනය කිරීමෙන් අනතුරු ව මැතිවරණ කොමසාරිස්වරයාගේ අනුමැතිය සහිත ව එම දිස්ත්‍රික් ලේකම්වරයා වෙත යළි යවනු ගැබේ. එසේ ම අවසන් ප්‍රතිඵල මැතිවරණ කොමසාරිස්වරයාගේ සහතික කිරීමෙන් පසු ව එය රජයේ ප්‍රවෘත්ති දෙපාර්තමේන්තුව වෙත නිකුත් කෙරේ. එම ප්‍රතිඵල රජයේ ප්‍රවෘත්ති අධ්‍යක්ෂ ජනරාල්වරයාගේ අත්සන ද සහිත ව මාධ්‍ය වෙත නිකුත් කරනු ලබයි.
මෙවර මැතිවරණ ප්‍රතිඵල නිකුත් කිරීමේදී එය ෆැක්ස් මඟින් මෙන් ම පරිගණකගත නව ක්‍රමවේදයක් ඔස්සේ එසැනින් අන්තර්ජාලය හරහා මාධ්‍ය ආයතන වෙත නිකුත් කිරීමේ ක්‍රියාමාර්ගයක් ද රජයේ ප්‍රවෘත්ති දෙපාර්තමේන්තුව විසින් ක්‍රියාත්මක කරනු ලබයි. ඒ අනුව ප්‍රතිඵල නිකුත් වූ විගසින් සියලු මාධ්‍ය ආයතන වෙත මැතිවරණ ප්‍රතිඵල නිකුත් කිරීමට රජයේ ප්‍රවෘත්ති දෙපාර්තමේන්තුව සියලු විධිවිධාන යොදා ඇත.
මීට අමතර ව රජයේ නිල පුවත් වෙබ් අඩවිය වන www.news.lk ඔස්සේ අන්තර්ජාලය හරහා http://election.news.lk/ යන වෙබ් අඩවියෙන් දෙස් විදෙස් සියලු දෙනාට ම ලබාගත හැකි වන පරිදි මැතිවරණ ප්‍රතිඵල නිකුත් කිරීමට ද කෙටි පණිවුඩ සේවාව මඟින් ද මැතිවරණ ප්‍රතිඵල නිකුත් කිරීමට ද ප්‍රවෘත්ති දෙපාර්තමේන්තුව පියවරගෙන තිබේ.
HC
