ඊයේ (17) රේස් කෝස් ග්‍රැන්ඩ් ස්ටෑන්ඩ් හෝටලයේදී මෙම නියෝජිත පිරිස හා ආරක්ෂක හා නාගරික සංවර්ධන අමාත්‍යාංශයේ ලේකම් ගෝඨාභය රාජපක්ෂ මහතාගේ ප්‍රධානත්වයෙන් යුත් ශ්‍රී ලංකාවේ නියෝජිත පිරිස සමඟින් රටවල් දෙක අතර වෙරළ හා සාගර ආශ්‍රිතව ඇති සහයෝගීතාව තවදුරටත් ශක්තිමත් කිරීමේ අරමුණින් දෙරටට ම වැදගත්වන සාගර කලාපයේ හා වෙරළ තීරයේ ආරක්ෂාව සම්බන්ධයෙන් වන කරුණු පිළිබඳ ව සාකච්ඡා පැවැත්විණි.
පෙරේදා (16) ශ්‍රී ලංකාවේ හා චීනයේ ජනාධිපතිවරුන් ඉදිරියේදී පවත්වන ලද දෙරට අතර ගිවිසුම් අත්සන් කරන අවස්ථාවේදී චීන - ශ්‍රී ලංකා වෙරළ හා සාගර ඒකාබද්ධ පර්යේෂණ සහ සංවර්ධන මධ්‍යස්ථානයක් ශ්‍රී ලංකාවේ ස්ථාපනය කිරීම සඳහා වන ගිවිසුමකට ද රටවල් දෙක විසින් අත්සන් තබන ලදී. මෙම ගිවිසුම සඳහා ශ්‍රී ලංකාව වෙනුවෙන් ආරක්ෂක හා නාගරික සංවර්ධන අමාත්‍යාංශයේ ලේකම් ගෝඨාභය රාජපක්ෂ මහතා සහ චීනය වෙනුවෙන් සමුද්‍ර පරිපාලනය පිළිබඳ රාජ්‍ය අමාත්‍ය ලියු සිගූයි මහතා අත්සන් තැබීය.
ඊයේ පවත්වන ලද සාකච්ඡාවලින් අනතුරු ව මෙම අවස්ථාව සිහිපත්වීම සඳහා ආරක්ෂක ලේකම්වරයා හා ලියු සිගූයි මහතා අතර සමරු තිළිණයන් හුවමාරු කර ගැනීමක් ද සිදු විය.
මෙම අවස්ථාව සඳහා සහභාගී වූ ශ්‍රී ලංකා නියෝජිත පිරිසට මංගල වික්‍රමරත්න මහත්මිය, ආචාර්ය එස්.ජී. සමරසුන්ද්‍ර ආරක්ෂක හා නාගරික සංවර්ධන අමාත්‍යාංශයේ අතිරේක ලේකම් (තාක්ෂණික) රොහාන් සෙනෙවිරත්න, ශ්‍රී ලංකා නාවික හමුදාවේ මාණ්ඩලික ප්‍රධානී රියර් අද්මිරාල් ආර්.සී. විජේගුණරත්න සහ නාවික හමුදාවේ අධ්‍යක්ෂ ජෙනරාල් (මෙහෙයුම්) රියර් අද්මිරාල් එන්.ජී.බී. රොසයිරෝ යන මහත්වරු සහභාගී වූහ.
NDH/mod
