පාර්ලිමේන්තු දිවියේ විසිවසර සපිරීම නිමිත්තෙන් අනුරාධපුර ප්‍රජා සෞඛ්‍ය ප්‍රවර්ධන නිලධාරීන්ගේ සංගමය විසින් පසුගියදා අමාත්‍ය තිස්ස කරල්ලියද්ද මහතා වෙනුවෙන් සංවිධානය කර තිබු උපහාර පිදීමේ උත්සවයේ ප්‍රධාන අනුශාසනාව පවත්වමින් පඤ්ඤානන්ද නාහිමියෝ මේ බව පැවසුහ. උපහාර උත්සවය අනුරාධපුර සමුපකාර ශ්‍රවණාගාරයේ දී පැවැත්විණි.
උපහාර උත්සවය ආරම්භ කිරීමට පෙර අමාත්‍ය තිස්ස කරල්ලියද්ද මහතා විසින් සිය දේශපාලන ගුරුවරයා වූ දිවංගත මෛත්‍රීපාල සේනානායක මහතාගේ, අනුරාධපුර නව පළාත් සභා සංකීර්ණයේ පිහිටි පිළිරුව වෙත පුෂ්පෝපහාර දැක්වීම ද සිදු කළේය.
අමාත්‍ය තිස්ස කරල්ලියද්ද මහතා මීට පෙර දේශීය වෛද්‍ය, ඉඩම්, සෞඛ්‍ය හා දේශීය වෛද්‍ය නියෝජ්‍ය, දේශීය වෛද්‍ය හා ආගමික කටයුතු නියෝජ්‍ය යන අමාත්‍ය ධූරයන්වල ද කටයුතු කර තිබේ.
“කෘතගුණ දන්න ජාතියක සුජාත දූ පුතුන් විසින් සිදුකරන ලද මෙම උපහාර පිදීමේ සත්ක්‍රියාව මනුෂ්‍ය ගුණදම් පිරිහී ඇති අද කාලයේ මිනිසුන්ට උදාර පාඩමක් කියාදෙනවා. තමන් උදව් උපකාර කර කෙනා පමණක් නොවෙයි වටිනාකම කියන්න බැරි තමන්ගේ දෙමාපියෝ අමතක කරන යුගයක නුවර කලාවියේ අහිංසක දෙමාපියන්ගේ මේ දරුවෝ ටික අද මේ රටට පමණක් නොවෙයි ලෝකයටම වටිනා ආදර්ශයක් ලබා දී තිබෙනවා.
තමන්ට රැකියාවක් ලබාදීලා සුදුසුකම් සම්පුර්ණ නොකළ දරුවන්ට ඒ සඳහා අවකාශයක් ලබාදී සුදුසුකම් සපිරු පසු සියලු දෙනාගේම රැකියා ස්ථිර කර දී අද අනුරාධපුර අහිංසක ජනතාවගේ ලෙඩ, දුක්, රෝග බිය දුරුකරන්න මේ ප්‍රජා සෞඛ්‍ය දරුවන් අපමණ වෙහෙසක් දරනවා.
වකුගඩු රෝගයන් රජරට ජනතාව සුවපත් කරන්න මීට වසර 15කට පෙර දේශීය වෛද්‍ය අමාත්‍යවරයා ලෙස ඔහු විවිධ වැඩසටහන් ආරම්භ කළා. දැනට දරණ අමාත්‍යාංශයේ සිටත් ඒ සඳහා මැටි වළං බෙදා දී ජනතාව දැනුවත් කරනවා. එදා මුළු රටම ලේ විලක් වූ යුගයේ කැබිතිගොල්ලෑව, පදවිය, මැදවච්චිය වැනි ප්‍රදේශවල ජනතාව කොටි ත්‍රස්තවාදීන්ගෙන් රැකගන්න ජනාධිපතිතුමන්ට යෝධ ශක්තියක් වුණේ තිස්ස කරල්ලියද්ද අමාත්‍යවරයායි. ඒ මහතා තමන්ගේ ජනතාව අමතක කර කොළඹට වී සිටියේ නැහැ. අමාත්‍යවරයා දේශපානලයෙන් තම පුද්ගලික අවශ්‍යතා සම්පුර්ණ කරගත්තෙ නැහැ. මැදවච්චියේ සිටිය මෛත්‍රීපාල සේනානායක නම් අසහාය දේශපාලන චරිතය තව තවත් බබලවන චරිතය ලෙස තිස්ස කරල්ලියද්ද අමාත්‍යතුමන් කටයුතු කරනවා. ”
මෙහිදී අදහස් දැක්වූ ළමා සංවර්ධන හා කාන්තා කටයුතු අමාත්‍ය තිස්ස කරල්ලියද්ද මහතා, “දේශපාලන ජිවිතයේ වගේ ම පුද්ගලික ජීවිතයේ ඉතාම සතුටට පත් දවසක් අද. මා දේශීය වෛද්‍ය අමාත්‍යාංශයේ නොසිටියත් මේ දරුවන් තමන් වෙනුවෙන්, තමන්ගේ රැකියා ලබා ගැනීම වෙනුවෙන් අද මේ කරන උපහාරය ඔබ වැනි දරුවන් බිහිකළ වාසනාවන්ත දෙමව්පියන්ටත් උපහාරයක්. ඒ වගේම මට පාර්ලිමේන්තුව වසර 20ක් පුරාම නියෝජනය කරන්න උදව් උපකාර කරමින් ආශිර්වාද කළ සියලු දෙනාටත් මේ උපහාරය හිමියි.
ඔබටත් වඩා උදව් උපකාරගත් ඇතැම් පිරිස් අද ඒ සියලු දේ අමතක කර තිබෙන යුගයක, මා අපේක්ෂා නොකළත් ඔබ ඔබගේ යුතුකමක් ලෙස මෙම උපහාර උත්සවය සංවිධානය කළා. ඔබේ දරුවන්ටත් මේ කෘතගුණ දැක්වීමේ ගුණය කියා දෙන්න. ”
කැබිතිගොල්ලෑව සුළුගල් දඹුළු විහාරවාසී කුංචුට්ටුවේ පාලිත හිමියන් ද මෙහිදී අනුශාසනාවක් පැවැත්වූහ.
ECB
