අද වන විට ද ගම් මට්ටමින් ප්‍රාදේශීය මට්ටමින් හා පළාත් මට්ටමින්ද විවිධ ආයතනවලින්ද විවිධ ව්‍යාපෘතින් සඳහා ත්‍රිවිධ හමුදාවේ සහය ඉල්ලමින් විශාල ලිපි ප්‍රමාණයක් ලැබෙන බව පැවසූ රාජපක්ෂ මහතා එයට හේතු වනුයේ හමුදාව විසින් මෙම වැඩ කටයුතු නිවැරදි ආකාරයට හා නිසි වෙලාවට සිදු කිරීම බවද ඒ සඳහා හමුදාව තුළ වඩා හොද නායකත්වයක් පවතින බව ද අනාවරණය කළේය. හොඳ නායකයෙන් බිහිකිරීම ද හමුදා පුහුණුවීම් තුළ ඇති එක් කරුණක් බවත් ඒ සඳහා විවිධ නායකයන්ගේ නායකත්ව ලක්ෂණ හා වැරදි හා අඩුපාඩු සිදු වන අවස්ථාවන්වල දී ඒවා මැඬ පවත්වාගෙන ඔවුන් ඉදිරියටම තම වැඩපිළිවෙළ කරගෙන යාම ආදිය අධ්‍යයනය කිරීම මඟින් ඒ පිළිබඳව ඔවුන් මනා දැනුමක් ලබාගන්නා බවත් ඒ අනුව යම් කාර්යයක් කිරීමේදී තමන් යටතේ සිටින අය වඩා හොඳින් මෙහෙයවීමේ හැකියාවක් ලබාගෙන ඇති බවත් පවසා සිටියේය.

හොඳ නායකත්වයක් කරා යාමේ දී පළමුවෙන්ම නිවැරදි දැක්මක් තිබිය යුතු බව පැවසූ ආරක්ෂක ලේකම්වරයා එකි අරමුණ ඉටු කර ගැනීම සඳහා ස්ථිර අධිෂ්ඨානයකින් යුතුව නිවැරදි සැලැස්මක් සාදා ගත යුතු බව ද අවධාරණය කර සිටි අතර එම සැලැස්මේ නිරවද්‍යතාව හා ශක්තිමත් බව මත තම අරමුණ කරා ගමන් කිරීමේ හැකියාව රදා පවතින බව ද පවසා සිටියේය. ඊළඟට එම සැලසුම ක්‍රියාත්මක කිරීම සඳහා සුදුසු කණ්ඩායමක් තෝරා ගත යුතු බවත් එසේ තෝරා ගනු ලබන අය ඊට එරෙහිව වැඩ කටයුතු කරන්නේ නම් ඔවුන් ඉවත් කර ඒ සඳහා අවශ්‍ය වෙනත් අය ආදේශ කිරීමේ හැකියාවත් හොඳ නායකයෙකු තුළ පැවතිය යුතු ගුණාංගයක් බව මෙහිදී පවසා සිටියේය. එසේම මෙම පිරිස සතු දක්ෂතාවන් හඳුනාගෙන අවශ්‍ය නම් ඔවුන්ට නිසි පුහුණුවක් ලබාදීම සිදුකළ යුතු බවත් තම අරමුණ කරා ගමන් කිරීමේදී තමාගේ පූර්ණ කැපවීම මෙන්ම තම කණ්ඩායමේ කැපවීම ඇති කිරීම අතිශයින්ම වැදගත් වන බවත් තම අරමුණ අවසානය කරා යන තුරුම එය නැවත නැවත සොයා බලා අධීක්ෂණය කිරීම හා ඒවා නැවත සකස් කිරීම ඉතාම වැදගත් අංගයන් වන බවද අවධාරණය කර සිටියේය.

අතිගරු ජනාධිපතිතුමා තමන් අනුගමනය කරන හොඳ ම නායකයෙකු බව පැවසූ ගෝඨාභය රාජපක්ෂ මහතා අප රටේ පැවති ත්‍රස්තවාදය අවසන් කිරීම සඳහා ජනාධිපතිතුමා ද ඒ ආකාරයෙන්ම ක්‍රියා කළ බවත් ඒ අනුව දේශීය හා විදේශීය විශාල පිරිසක් කිසිදා යුදමය අතින් පරාජය කළ නොහැකි බවත් ත්‍රස්තවාදය හමාර කිරීමට හැකි වූ බවත් පැවසූ අතර කොළඹ නගරය දියුණු කිරීම හා තම අමාත්‍යාංශය විසින් දියත් කරනු ලබන වෙනත් ව්‍යාපෘතීන් සම්බන්ධයෙන් ද තමාත් ඉහත දැක්වූ ආකාරයෙන්ම ක්‍රියා කරනු ලබන බවත් ඒ තුළින් බොහෝ දේ පහසුවෙන්ම ජයග්‍රහණය කළ හැකි බවත් පවසා සිටියේය.

මේ ආකාරයෙන් නායකත්වය පිළිබඳ ලක්ෂණ හා ගුණාංගයන් වැඩිදියුණු කරගෙන අප රට ආසියාවේ ආශ්චර්යය කරා යන ගමනේදී තම සැඟවුණ දක්ෂතාවන්ගෙන් උපරිම ප්‍රයෝජන ලබාදෙන ලෙසත් යූත් පාර්ලිමේන්තුවේ සිටි තරුණ මන්ත්‍රීවරුන්ගෙන් ඉල්ලා සිටි ගෝඨාභය රාජපක්ෂ මහතා මෙම 10 වැනි සැසිවාරය ඇමතීම සඳහා තමාට ආරාධනය කිරීම සම්බන්ධයෙන් ඩලස් අලහප්පෙරුම ඇමතිතුමා ඇතුළු සියලු දෙනාටම සිය ස්තූතිය පුද කර සිටීමට ද මෙහිදී අමතක නොකළේය.

NDH/mod