යුද්ධ හමුදා මූලස්ථානය වෙත සපැමිණි නව ආරක්ෂක ලේකම්තුමන්ව යුද්ධ හමුදා මූලස්ථාන බලඇණියේ අණදෙන නිලධාරි ලුතිනන් කර්නල් ප්‍රදීප් ගමගේ විසින් උණුසුම් අයුරින් පිළිගත් අතර ඉන් පසුව හමුදා සම්ප්‍රදායානුකූල කඳවුරු සම්මාන මුරයක් ද පිරිනැමීය.
අනතුරුව, විජයබාහු පාබල රෙජිමේන්තුවේ භට පිරිස් විසින් හමුදා සම්ප්‍රදායානුකූල සම්මාන ආචාර පෙළපාලියේ ගෞරවාචාරය ද පිරිනමනු ලැබීය.
ඉන් පසුව, ආරක්ෂක ලේකම් වෙත යුද්ධ හමුදා විධායක ජෙනරාල් මේජර් ජෙනරාල් ශවේන්ද්‍ර සිල්වා මහතා සමඟින් හමුදා සම්ප්‍රදායානුකූල සම්මාන ආචාර පෙළපාලිය නිරීක්‍ෂණය කිරීම සඳහා පෙළපාලියේ අණදෙන නිලධාරිතුමන් විසින් ආරාධනා කළහ.
ඉන් අනතුරුව, නව ආරක්ෂක ලේකම්තුමන් වෙත සම්මාන ආචාර පෙළපාලියේ ගෞරවාචාරය පිරිනමනු ලැබු අතර එම අවස්ථාව සඳහා යුද්ධ හමුදා ජ්‍යෙෂ්ඨ නිලධාරින් විශාල පිරිසක් සහභාගි වූහ.
