ජාතික පාසල් විදුහල්පතිවරුන් සඳහා ස්වයං විනය, ආයතනික විනය සහ නායකත්ව පිළිබඳ බැහැරගත පුහුණු වැඩසටහනට අදාළ ව, පුහුණුව සැලසුම් කිරීමේ සිට, මිළ ගණන් කැඳවීම, ආයතන තෝරා ගැනිම සහ සංවිධානය කිරීම සම්බන්ධයෙන් වගකීම් විරහිතව, අනවධානයෙන් සහ නොසැලකිලිමත් ලෙස තම රාජකාරි වගකීම් පැහැර හරිමින් ක්‍රියා කළ බවට සනාථ වී ඇති පහත සඳහන් නිලධාරීන්ට එරෙහිව විනයානුකූලව ක්‍රියාමාර්ග ගැනීමට නියමිතයි.
1) මානව සම්පත් සංවර්ධන අංශය භාර අතිරේක ලේකම් (පාසල් කටයුතු),
2) මානව සම්පත් සංවර්ධන අංශයේ අධ්‍යක්ෂ
3) මානව සම්පත් සංවර්ධන අංශයේ නියෝජ්‍ය අධ්‍යක්ෂ
4) ප්‍රසම්පාදන අංශය භාර අතිරේක ලේකම්
5) ප්‍රසම්පාදන අංශයේ ගණකාධිකාරීවරිය
6) තාක්ෂණ ඇගයීම් කමිටු සාමාජිකයන්
7) ප්‍රසම්පාදන කමිටු සාමාජිකයන්
මේ අතරින්, මානව සම්පත් සංවර්ධන අංශයේ අධ්‍යක්ෂ සහ නියෝජ්‍ය අධ්‍යක්ෂ තනතුරු දැරූ නිලධාරීන් එම තනතුරු වලින් වහාම ඉවත් කිරීමටද නිර්දේශ වී තිබෙන බව අමාත්‍යාංශය සඳහන් කරයි.
එමෙන්ම, එම පුහුණු වැඩසටහන සංවිධාන කළ අමාත්‍යාංශයේ මානව සම්පත් සංවර්ධන ශාඛාවේ වගකීම්, අදාළ අංශය භාරව කටයුතු කළ අතිරේක ලේකම්වරයාගේ (පාසල් කටයුතු) විෂය පථයෙන් වහා ඉවත් කිරීමටද අදාළ විමර්ශනය මගින් නිර්දේශ කර තිබේ.
මීට අමතරව නිලධාරීන්ගේ ආරක්ෂාව සම්බන්ධයෙන් නිසි ආරක්ෂිත ක්‍රමවේදයන් අනුගමනය නොකළ අදාළ බැහැරගත පුහුණු වැඩමුළුව පවත්වන ලද පෞද්ගලික ආයතනය අසාදු ලේඛන ගත කිරීමටද නිර්දේශ කර තිබේ.
එමෙන්ම, මෙම අවාසනාවන්ත සිදුවීමෙන් දිවි අහිමි වූ හම්බන්තොට සුචී ජාතික පාසලේ විදුහල්පති රේණුකා කුමාරි අතපත්තු මහත්මියගේ සැමියාට හා දරුවන්ට වන්දි මුදලක් ලබා දීමට සහ ඇයට හිමි වැන්දඹු හා අනත්දරු විශ්‍රාම වැටුප්, මෙන්ම දරුවන් සඳහා හිමිවන රක්ෂණාවරණ ප්‍රතිලාභ ද කඩිනමින් සකස් කර දීමටද පියවර ගැනෙනු ඇති.
මේ සම්බන්ධයෙන් අදහස් දැක්වූ අධ්‍යාපන අමාත්‍ය අකිල විරාජ් කාරියවසම් මහතා, මිනිස් ජීවිත පිළිබඳ වගකීමෙන් යුතුව වැඩ කිරීමේදී නොසැලකිලිමත් බව හෝ නිදහසට කරුණු ඉදිරිපත් කිරීමෙන් පළක් නොමැති බව අවධාරණය කරයි. එමෙන්ම මෙවැනි සිදුවීම් හේතුවෙන් අධ්‍යාපන අමාත්‍යාංශයේ කීර්ති නාමය සහ ජනතා විශ්වාස පළුදු වී යන බැවින් නැවත මෙවැනි අවාසනාවන්ත සිදුවීම් ඇති නොවීම සඳහා වගකිව යුත්තන්ට එරෙහිව දැඩි විනය ක්‍රියාමාර්ග අනුගමනය කරන ලෙසද අධ්‍යාපන අමාත්‍යවරයා ලේකම්වරයාට අමාත්‍යවරයා වැඩිදුරටත් උපදෙස් ලබාදී තිබේ.
