ලාංකීය සිනමාවේ සාම්ප්‍රදායික හැඩතලය,රැඩිකල් අවකාශයකට විවර කළ පුරෝගාමියෙකු වූ ප්‍රවීණ චිත්‍රපට අධ්‍යක්ෂ තිර නාටක රචක ධර්මසේන පතිරාජයන්ගේ අභාවය සැළව සාතිශය සංවේගයට පත් වූ බව අතිගරු ජනාධිපති මෛත්‍රිපාල සිරිසේන මහතා ශෝක පණිවුඩයක් නිකුත් කරමින් කියා සිටියි.
නිකුත් කළ නිවේදනය මෙසේය..
ශෝක පණිවුඩය
ලාංකීය සිනමාවේ සාම්ප්‍රදායික හැඩතලය, රැඩිකල් අවකාශයකට විවර කළ පුරෝගාමියෙකු වූ ප්‍රවීණ චිත්‍රපට අධ්‍යක්ෂ තිර නාටක රචක ධර්මසේන පතිරාජයන්ගේ අභාවය සැළව සාතිශය සංවේගයට පත්වීමි.
හන්තානේ කතාව සිනමා පටයේ අධ්‍යක්ෂවරය ලෙසින් සිනමාවේ අත්පොත් තබන පතිරාජයන්, සිය ප්‍රථම නිර්මාණය වන අහස් ගව්ව සිනමා පටයෙන් ලාංකීය සිනමාව නව කියැවීමකට යොමු කළේ ය. අනතුරුව හැත්තෑව දශකය සිය විප්ලවීය ආඥදායකත්වයට හසුකරගත් ආක්‍රමණකාරී ගැටවරයා, එයා දැන් ලොකු ළමයෙක්, බඹරු ඇවිත්,පාරදිගේ, සොල්දාදු උන්නැහේ සමඟ අසූවේ දසකයට පා තැබුවේ, අපේ සිනමාව ප්‍රබුද්ධ ප්‍රවේශයකට කැඳවාගෙන යමිනි.
''පොන්මනී'' දෙමළ සිනමාපටය අධ්‍යක්ෂණය කරමින් සාමාජීය සංහිඳියාවේ සොඳුරු පණිවුඩය සිනමා තිරය මත කැටපත් කළ පතිරාජයන්, දේශීය සිනමාවේ අනාගත වංශය ලියන්නා වූ පරම්පරවට පූර්වාචාර්යවරයකු විය.
නිර්භයව සහ සෘජුව සිනමාව දේශපාලනික කියවීමක් බවට පත් කළ මේ අග්‍රගණ්‍ය සිනමාවේදියාණන්, වේදිකාව මෙන් ම ගීත රචනයද පරිවර්තන සාහිත්‍ය ද අතික්‍රමණය කළ බහුවිධ ශක්‍යතාවයන්ගෙන් හෙබි මහා වනස්පතියක්
බඳුය.
සසර නියාමයට අනුගතව දැවැන්තයා නික්ම ගියද ඔහුගේ සෙවනැල්ල චිරාත් කාලයක් සහෘද සිත් සතන් තුළ පියා විදාළන සොඳුරු කවියක් සේ සලකුණුව පවතිනු ඇත. ධර්මසේන පතිරාජ නම් විශිෂ්ටයාට, වියෝව ඇවිළෙන හදවතින් සමුදෙමින් නිවන් සුව පතමි.
මෛත්‍රිපාල සිරිසේන
ජනාධිපති
2018 ජනවාරි 28 වැනි දින
