"සුපිළිපන් පාලනයක්" යන තේමාවෙන් පැවැත්වෙන මෙම සමුළුව නීතිය හා සාමය සහ දක්ෂිණ සංවර්ධන අමාත්‍යංශය, ජනාධිපති ලේකම් කාර්යාලය හා අල්ලස් හෝ දූෂණ චෝදනා විමර්ශනය කොමිෂන් සභාව විසින් සංවිධානය කරනු ලබයි.
ජනාධිපති මෛත්‍රීපාල සිරිසේන මැතිතුමාගේ සංකල්පයක් අනුව සංවිධානය කරන මෙම සමුළුව දෙසැම්බර් 09දාට යෙදෙන ජාත්‍යන්තර දූෂණ විරෝධී දිනයට සමඟාමීව පැවැත්වේ.
මෙහි ප්‍රධාන සැසිය "මැතිවරණ ප්‍රචාරණ වියදම් තුළින් ඇතිවන දූෂණය" මැයෙන් පැවැත්වේ. ප්‍රධාන සැසියෙන් අනතුරුව "රාජ්‍ය අංශයේ දූෂණය පෞද්ගලික ඇසින්", "රාජ්‍ය නිලධාරීන් වෙත ඇති කරන පීඩනය දූෂණයට මග පාදන්නේද?" හා "නිල රාජකාරි ඉටු කිරීමේදී විනිවිදභාවය, වගවීම හා බැඳියාවන් අතර ගැටුම" මැයෙන් සමඟාමී සැසි 03ක් වශයෙන් පැවැත්වෙන අතර සමාලෝචන සැසිය අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙන් පැවැත්වේ.
මෙම සමුළුව සඳහා දේශපාලන නායකයින්, රාජ්‍ය අංශයේ නිලධාරීන් හා මාධ්‍ය, සිවිල් ක්‍රියාකාරීන් ඇතුළු 800කට ආසන්න පිරිසක් සහභාගිවීමට නියමිතය.
